主頁 > 最新旅遊情報 > 各地情報 > 【香港情報】 香港18區美食大搜查 黃大仙有乜好食?

【香港情報】 香港18區美食大搜查 黃大仙有乜好食?

有聞黃大仙有求必應,唔知係咪連住喺黃大仙市民嘅願望都有聽到,所以區裡面都有唔少平民得嚟又好味嘅食肆。周末不妨去一趟黃大仙這個舊區,由山腳食到山頂,試盡特色食物。

必食辣汁酸齋厚冬菇 友記車仔麵 

黃大仙有很多車仔麵店都富有特色,要食「歷史」的話,一定要試試大磡村友記車仔麵。如果吃得辣,一定要加辣汁,再飲支冰凍玻璃樽可樂,好爽!而且近年這間車仔麵店的衛生情況改善了很多,不過風味依舊,夾食物的大嬸亦依然那麼心急隔着玻璃催人揀餸。

地址: 黃大仙 鳯凰新村銀鳯街5號鳯凰村大廈地下

街坊推介黯然銷魂飯 英都燒味廚房

雖然睇落就好似普通茶餐廳,但聽聞叉燒嚟講,黃大仙區佢認第二無人咁認第一。叉燒鬆化得嚟又香口,肥瘦比例適中而肉味濃郁。嚟碟黯然銷魂飯,燶邊半生熟荷包蛋,撈埋叉燒同豉油無得輸。黯然銷魂飯唔啱嘅話仲有滑溜香口嘅叉燒炒滑蛋飯,或者香噴噴嘅葱油叉燒撈公仔麵。下午茶可以點新鮮叉燒番茄豬仔包,夾埋生菜、番茄同醃青瓜更清新!

地址: 黃大仙鳳凰新邨雙鳳街20號地下

辣得「喜」川菜老店 詠藜園四川菜館

招牌擔擔麵湯底濃香味美,麵條彈牙有咬口。食肉獸可以加錢轉改良版,更多肉碎撈住食更滋味;無辣不歡嘅記得叫麻辣擔擔麵,啖啖麻辣過癮。中場休息食碟皮蛋豆腐,雖然豆腐係來貨但勝在滑溜無比,配埋流心皮蛋同甜甜地嘅醬汁,醒神返哂。另外水煮牛肉、口水雞同涼拌雞絲拉皮都有唔少人推介。最後叫翻碟豌豆黃做甜品,滿足哂。

地址: 竹園鳳德道15號

廿四小時無休冬菇亭 醉和里

如果話正宗潮洲小店已經唔多,咁舊式冬菇亭更加係買少見少,呢間仲要係二十四小時無休營業,幾點都歡迎嚟開餐。凌晨開始有各種點心,午市開始做炒粉麵飯同港式常餐,晚市就提供廣式小炒同潮式打冷。特別推介晚市小菜,無論係外脆內軟嘅邪惡酥炸大腸,定係金黃惹味嘅南乳炸雞件,都啱哂放工送啤酒。

地址:黃大仙下邨正德街熟食亭2號舖

後巷小店抵食四式串燒 原燒

要數這區的人氣店,這間串燒一定榜上有名,晚晚都有不少街坊聚集,拮吓串燒,飲吓啤酒。店舖隱身在崇華街內一條巷仔,串燒因應不同食材,配撘4款不同調味,好似雞翼會用蜜糖燒、雞皮用鹽燒、牛脷用照燒汁調味、羊肉配孜然粉。試過真係好味,尤其是雞皮、墨魚咀,調味出色,最重要是大大串、價錢平,大部分不用15蚊一串,款式又夠多。

地址:黃大仙鳯凰新村崇華街44號地下

30款榴槤甜品 糖川甜品

榴槤甜品很多糖水店都有得食,但這間竟然做出超過30款來!!榴槤拿破崙、千層蛋糕、pancake、雪糕、雪米糍,連炸両都有!全部都是用馬來西亞D24榴槤肉做,味道濃郁,榴槤迷必要朝聖。

地址:黃大仙鳯凰村銀鳯街16號地下

花心思心太軟+紫薯甜品 想甜嚐甜

以為舊區就無特色甜品店?咁你就大錯特錯啦,呢間小店以特色心太軟發圍,唔單止有少女最愛嘅玫瑰荔枝、大熱抹茶、重口味榴槤等應有盡有,而且流心效果唔錯,配酸酸地嘅乳酪雪糕完全唔Heavy。另外紫薯甜品係另一推介,紫薯奶凍放喺菂式煲仔裡面,打開蓋見到滿滿嘅紫薯粒立刻變心心眼,配埋少少甜嘅滑溜奶凍,味道平衡。

地址: 竹園蒲崗村道73號


【GOGOAdvise Travel旅遊日記 現在徵稿】
歡迎來稿分享對旅遊、購物、美食、活動既情報。如蒙投稿,請寄 travel@gogoadvise.com.hk,另請附上照片一張及不多於80字撰稿人簡介,撰稿人可用真名或筆名。文章一經採用,或會將由Travel旅遊日記編輯部作潤飾,及會開設作者個人專欄。

愛旅遊的電話婷

鈴…鈐…鈐…

愛旅遊的電話婷
愛旅遊的電話婷
鈴...鈐...鈐...
GOGOAdvise - Travel旅遊日記