主頁 > 最新旅遊情報 > 【調查情報】 你有冇遇過? 最乞人憎飛機乘客龍虎榜

【調查情報】 你有冇遇過? 最乞人憎飛機乘客龍虎榜

古語有云:百世修來同船渡,我話下聯應該係:千世修來「坐隔離」!當大家共處於飛機艙呢個密閉空間,人與人之間互動變得更緊密,理應互常體諒,自己就當然唔好煩到人,好可惜,硬係有啲人永遠唔識得重別人的個人空間;好彩嘅話,一小時短途我都由得你,唔好彩 16 粒鐘 direct flight 飛紐約遇着佢哋,我想知,是咪我前世欠咗你。

話說美國 Expedia 剛進行第 4 屆「客機禮議」調查,「最討厭」冠軍同往年一樣,其他上榜行為亦驚喜欠奉,大家都見慣見熟,一句講晒,莽顧別人的人類及其行為,確實無分種族、國界、時空!

第 10 位:美食飄香惹人厭 / 得票率:30%

聽落冇乜嘢呀可?親歷其境就知有幾困擾。試過上海返香港坐機尾,未起飛已經聞到「紅油抄手」嗰陣超強勁辣油加生蒜味,原來有旅行團團友拎外賣出嚟食,隔五行都聞到!冇~唔係唔畀人食嘢~係好想講句「點呀……」啫。

第 9 位:座位扶手霸到實 / 得票率:34%

經濟客艙苦主先明:連位,就是連扶手都要 share。但請問阿隔離位,你憑甚麼好似皇帝坐龍椅咁「雅」實晒兩邊扶手?(憤怒咬唇)

第 7 位:座位有得挨後 挨到盡 / 得票率:35%

座椅預設咗可以挨後,點解我唔可以挨到盡?呢個問題,其實等於口同鼻拗,宇宙係唔會得出共識的。但話說回來,挨後咗張凳,其實更容易被後座乘客頂到、出入時撞到、或直頭用你張椅背做扶手,係咪反而得不償失呢?

第 7 位:落機執輸慘過敗家?/ 得票率:35%

硬係有人信奉「行船爭解纜,飛機我落先」,明明坐第 62 行,一停機就全副武裝、起晒槓咁,務求塞得幾前得幾前,而佢哋總係會不偏不倚地,阻住你拎行李!可能佢哋趕住轉機啦,唔知呀;如果飛機泊 outer bay,要等接駁巴士上齊人先開車,此時大家只需要對佢哋點吓頭、微笑一下,默念:落機何太急呢,師主。

第 6 位:吹水唔該抹抹嘴 / 得票率:40%

OK 終於有一項係我哋未必有共鳴,或者係西人先咁鍾意同陌生人搭訕(如果閣下係俊男或美女,情況可能不一樣),調查話有六成半受訪者都頂唔順鄰座吹水唔抹嘴,三成半人仲希望機艙劃分「quiet zone」。唔該,please shut up!

第 5 位:酒鬼 / 得票率:49%

其實任何時侯都擔心遇上酒鬼,因為佢地行為冇路捉,有時會大叫、有時會喴、有時會唱歌、有時仲會郁手郁腳,仲可能冇喇喇嘔係你坐位附近甚至你身上,最慘係係機上冇得遠嚟佢,分分鐘要對住佢坐成十幾個鐘。

第 4 位:耳筒嘈到我失眠 / 得票率:49%

呢一點,相信唔多人留意,但原來咁多人介意:隔離位耳筒漏音(飛機附設嗰啲 cheap cheap headphone 尤其容易),其實都阻人休息!日本方面最近就有鐵路推宣傳片叫人留意音量,樂迷都可以留意返。

季軍:鄰座怪客有異味 / 得票率:55%

哪怕係腳臭、狐仙、汗香、頭油……氣味隨風飄揚,完全防不勝防,最慘係同隔離位三唔識七,難道要同佢講「唔好意思你好臭」?所以我有朋友係自備口罩,封住嗅覺,情願聞返自己啲口氣算喇……

亞軍:家長懶理失控兒 / 得票率:59%

為人父母甚艱難,我知;細路失控冇晒符,我明;BB 扭計、呵極都喊,難道真係要塞佢入喼?所以作為乘客嘅我哋先咁無奈!Extra 加倍無奈嘅係,連家長都冇打算適當地管束子女,闊佬懶理、就手旁觀,令其他人受到不必要的滋擾!

冠軍:宇宙最煩天殘腳 / 得票率:64%

坐上了飛機,衝上了雲霄,氣壓自然大幅增大,腳部亦會輕微腫脹,當然好想將鞋襪除掉,但有沒有想過這種行為,是把自己的快樂建築於別人的痛苦之上?睇到嚟呢個「毛聞」,相信大家都好想爆:世上永遠有人意識唔到,飛機椅背其實絕對唔厚,有啲 cheap 凳甚至足以令你 feel 到,有幾多隻腳趾正在撩緊你背脊!請問閣下是擁有 50 吋長腿的超模嗎?頂頂頂頂請問你頂夠未?坐好啲得唔得?如果遇到以下這些情況,編輯建議按鈴讓空中服務員解決。


【GOGOAdvise Travel旅遊日記 現在徵稿】
歡迎來稿分享對旅遊、購物、美食、活動既情報。如蒙投稿,請寄 aeronautmediacompany@gmail.com,另請附上照片一張及不多於80字撰稿人簡介,撰稿人可用真名或筆名。文章一經採用,或會將由Travel旅遊日記編輯部作潤飾,及會開設作者個人專欄。

GOGOAdvise - Travel 旅遊日記