主頁 > 最新旅遊情報 > 各地情報 > 中國情報 > 【中國情報】 深圳無印酒店試住報告 每晚要$….包早餐 抵唔抵玩?

【中國情報】 深圳無印酒店試住報告 每晚要$….包早餐 抵唔抵玩?

講到2018年最令人期待的新酒店,絕對係全球首家無印直營MUJI Hotel要喺深圳開的消息!唔少無印迷都非常期待呢間新酒店,其實已經係今年1月18日正式開幕啦!想知深圳直營店可唔可以維持無印一貫的風格,同埋抵唔抵住的話,即睇介紹!

MUJI 酒店強調環保理念,所以酒店好多地方都係採用舊木,廢物再利用,令無印酒店有特色之餘,亦可以符合環保概念!

優點1:價錢唔算貴 HKD1050/晚起

MUJI Hotel的4至6樓共有79間客房,分別有5種房型,全部都是雙人房,基本配備相近,最大的分別在於每間客房的大小。

最大的房型E 要成HKD2900,但有51-61平方米,大大個落地玻璃對住公園景,景觀都算不錯,加上有衣帽間,MUJI 桌椅梳化慢慢歎,有能力豪歎不妨一試!

優點2:房間一貫無印風格 無印迷大愛

房內貫徹無印簡約風格,由深澤直人設計的壁掛式CD播放器,已經預先入碟,播放統一無印店內可以聽到的音樂,所以一行入每間房,就可以聽到熟悉的無印音樂。

每間客房都配備的牙刷、牙膏、浴帽、化妝棉、洗髮液、護髮素、沐浴露、洗手液、電水壺、拖鞋等,通通都係無印出品,儘管你屋企本身已經用齊呢批日用品,但咁樣夾埋無印酒店感覺爭好遠!

而每一間房間的空間感好夠,主因是樓底有成3米,加上有個大大的落地玻璃,空間感十足!

優點3:房內免費位多

MUJI 酒店的每間房內,都會有掛耳式咖啡包、茶葉,以及兩支水可以免費飲用。唔好睇小兩支水,包裝係由深澤直人全新設計,而且店舖都暫未有得賣!

房內的酒店指南仲寫明,牙刷、拖鞋、墨水筆都歡迎帶走留念!

優點4:酒店設施完善

酒店雖然只有6層,唔算大規模,但該有的設施都應有盡有!健身房免費使用,有埋更衣室夠方便。落地玻璃對住新商場的品牌街,而且健身房6am-11pm都有專人指導,相當貼心!

Common Room 內有個大大的書架,650本書可以借來看,但只限於Common Room 同會議室範圍,千萬唔好拎走!會議室可以同時容納200人,亦可以一開三變成3個細會議室,有需要開會的話可以借用。

優點5:MUJI Diner 嘢食更平

香港雖然未有MUJI Diner,但Cafe & Meal 普通一個四餸飯都要過百,深圳MUJI 三餸都只係RMB58,兩熱盤加一凍盤,仲有湯加飯,而4品都係RMB68,5品RMB78,不過記者食完,覺得味道都係一般!

缺點1:地點不算便利

MUJI Hotel 與最近的地鐵站蓮花村站大約是2公里的距離,步行過去起碼要15-20分鐘,好在與皇崗、福田口岸都算近,從皇崗口岸坐的士10分鐘內就到,實測車費才RMB17,唔使諗啦。而福田口岸搭的士大概亦只需10分鐘,RMB22.5車費,如果想入住,建議搭的士最方便!

缺點2:景觀相當一般

雖然有個大大的落地玻璃,但只有一個房型可以對住蓮花山,記者入住的房型對住時尚購物街,有兩大幢高樓阻擋視線,影響景觀。

房間只有4樓有露台,只能容納一個人行出去。酒店4樓放了一隻超大的船,據說是可以反映深圳的漁港歷史,雖然好有歷史意義,但如果房間對住呢條船,都會覺得幾悶。

缺點3:Wi-Fi 較慢!

另一個香港人最關心的問題,就係酒店 Wi-Fi!目前酒店Wi-Fi相當緩慢,想上網睇片都會有啲慢,加上好多香港網如WhatsApp、Instagram 都上唔到,如果要同香港朋友聯絡,都係買電話卡比較好!

率先逛

深圳無印良品旗艦店同香港有咩分別?

走三合一路線的無印酒店,集商店、餐廳、住宿於一身,本來以為深圳無印良品旗艦店會同香港嘅一模一樣,但原來都有驚喜!唔單止賣嘅嘢有少少唔同,仲有工作坊!

特色1:5分鐘自選刺繡

香港未有的刺繡工坊可以喺深圳旗艦店搵到,店員仲話5-10分鐘就有,不過可能因為仲係試業階段,記者等足45分鐘先拎到!

客人只要購買指定無印產品之後,就可以即場刺繡,3個字以內收費RMB30,選擇指定圖案每個RMB10,而自繪圖案8cm x 8cm就要RMB230,要整DIY簡單做手信唔使响日本做喇!

特色2:孕婦裝都有!

香港無印有齊男裝、女裝、嬰兒裝,但偏偏就係無孕婦裝!以後懷孕媽媽,不妨北上買靚衫!

特色3:RMB5 一支筆!

和香港唔同,深圳無印有時會有特別減價,記者就搵到有款擦膠筆香港都無,重點係一支只要RMB5!做手信都抵啊!

特色4:OMG國產零食

無印生意可以咁好,好大原因都係Made in Japan,記者發現深圳無印有好多新產品,仔細一睇,原來好多都係Made in China!產地來自惠州、浙江等都有,唔少口味都好「中國」,想買Made in Japan 的無印產品,就要睇清楚產地啦!雖然made in China,都有依足日本生產規定,食得安心!


【GOGOAdvise Travel旅遊日記 現在徵稿】
歡迎來稿分享對旅遊、購物、美食、活動既情報。如蒙投稿,請寄 travel@gogoadvise.com.hk,另請附上照片一張及不多於80字撰稿人簡介,撰稿人可用真名或筆名。文章一經採用,或會將由Travel旅遊日記編輯部作潤飾,及會開設作者個人專欄。

我只係一個普通嘅…香港人

進激的艾倫
我只係一個普通嘅…香港人
GOGOAdvise - Travel旅遊日記