主頁 > 最新旅遊情報 > 專門情報 > 其他情報 > 【其他情報】 做空姐好似做到_ _咁 空姐: 麻煩客可分為四大等級

【其他情報】 做空姐好似做到_ _咁 空姐: 麻煩客可分為四大等級

有空姐於網上論壇發文大數工作心聲,仲將麻煩客人分為「四大等級」。空姐A:「三日唔埋兩日就飛一定好嘆?唔好忘記我哋班空中服務員其實做到隻積咁!小妹滿腔戾氣真係好需要宣洩下。對於空姐空少嚟講,麻煩客分四級。佢哋都係有不同程度嘅問題而至障礙,可能好多你哋都聽到嫌,但真係講極都唔得呢班人醒。」

麻煩客四大等級初階:低能

做空姐就好似做保姆咁,但係同時係幾廿人嘅保姆。上咗半空幾萬呎,好多人都會智商及自理能力向反方向進發。食嘢食到一地都係、喺機上飲嘢漏口嘅機會率都零舍高、去廁所洗完手張紙巾唔識掉入個垃圾桶等等…

派嘢飲嗰陣久唔久就會遇到啲以為飛機搬咗成個7-11上嚟嘅客:「雀檸吖唔該」「青島吖」「朱奶」

麻煩客四大等級中階:玻璃心

不過低能嘅客人其實唔難應付,最難搞嘅其實係啲玻璃心死要面嘅客人。同佢講「沒有」就等於冒犯咗佢祖宗十八代。呢類人會即刻發難唔用腦地鬧人:「無?點解會無?你有無盡過力?%@#︿$*#%*︿(#!$」無… 咪無囉,真係咁難理解咩?

麻煩客四大等級中高階:R著數

部分客人聽到我哋嘅回覆後會繼續鬧,分別在於:一啲會要求你企定定聽佢鬧,而一啲就繼續自言自語。但無論係邊一款,佢哋嘅共通點都係務求影響到身邊其他嘅客後,你會為求息事寧人而畀著數佢。

麻煩客四大等級高階:損人不利己嘅自私精

不得不說有啲客人真係好清高,鬧你唔係為著數,我諗佢哋都唔係好知自己想點,總之就係唔畀你繼續派餐唔畀你行開,總之要你企定定聽佢問候公司以至自己嘅祖宗,總之就係佢得不到滿足嘅話其他人都要陪佢受罪,你畀著數佢佢唔要,仲問你當佢咩人,我都搞唔清你係咩人,到底呢啲人諗緊乜?你想我點啊?


【GOGOAdvise Travel旅遊日記 現在徵稿】
歡迎來稿分享對旅遊、購物、美食、活動既情報。如蒙投稿,請寄 travel@gogoadvise.com.hk,另請附上照片一張及不多於80字撰稿人簡介,撰稿人可用真名或筆名。文章一經採用,或會將由Travel旅遊日記編輯部作潤飾,及會開設作者個人專欄。

旅行會使我們感到靜默,但也能因此讓我們成為會說故事的人

我的旅遊日記
旅行會使我們感到靜默,但也能因此讓我們成為會說故事的人
GOGOAdvise - Travel旅遊日記