主頁 > 最新旅遊情報 > 各地情報 > 中國情報 > 【高鐵攻略】 6個佛山/肇慶打卡必去景點懶人包 勁方便最快1.5小時就到

【高鐵攻略】 6個佛山/肇慶打卡必去景點懶人包 勁方便最快1.5小時就到

自從高鐵(香港段)上年正式通車後,香港人北上玩樂、旅行或公幹已經方便咗好多。高鐵由7月10日起已經新加咗14個內地站點(目前一共有58個內地站點),可到港鐵嘅高鐵專頁睇下詳情,當中6個香港人熱門旅遊目的地 – 佛山、肇慶、汕頭、南寧、重慶及天津都可以坐高鐵直接去到喇!

5小時內中短途旅遊站點 最受香港人歡迎

高鐵係目前香港前往內地最快捷同方便嘅陸路交通,當中以5個小時內中短途城市最受香港人歡迎。今次新增嘅站點中已經包括佛山西(約1.5小時)、肇慶東(約1.5小時)、汕頭(約3.5小時)及南寧東(約4小時)等熱門目的地。今次我哋為大家揀咗2個目的地: 佛山同肇慶介紹下。咪以為呢2個地方好悶,只係得啲山景/海景咁,其實都好適合一眾文青或者年輕一族去,唔信?一齊睇下當地有咩影相打卡必去熱門景點,最重要嘅係由香港西九龍站出發都只係個半鐘左右就到,輕輕鬆鬆咁玩個2日1夜周末快閃遊都抵呀。

佛山打卡必去熱門景點01: 西樵山國藝影視城

西樵山國藝影視城,係個出名嘅電影/電視劇拍攝場地,總面積有成500,000平方米咁大,而當中劃分咗香港街、九龍城寨、廣州街、上海街、王宮、古大宅及火車站等多個著名拍攝場景,除咗TVB成日嚟取景之外,好多荷里活電影都會嚟拍攝,所以非常適合打卡一族,任你點影都得。

佛山打卡必去熱門景點02: 盈香生態園全景玻璃橋

位於佛山盈香生態園嘅全景玻璃橋,絕對係個超刺激嘅打卡位。呢條唔係普通嘅玻璃橋,而係廣東第一座加咗5D特效嘅橋!喺玻璃橋上面行本身已經令人感覺步步驚心,加埋驚險刺激5D特效,腳步行到邊玻璃就會「破碎」到邊,同時聽住玻璃碎裂嘅響聲,絕對令人心跳加速。

佛山打卡必去熱門景點03: 岭南天地

岭南天地可以話係佛山最潮最In嘅街拍勝地,不論古典風格或者現代元素嘅建築物都可以係裡面搵到。當中打卡位非常多,包括「網紅打卡位」鯉魚廣場紅石磚牆,仲有古典同時尚結合嘅鐘樓及色彩斑斕嘅特色街巷等等…

肇慶打卡必去熱門景點01: 盤龍峽激流

嚟到肇慶當然要玩激流,盤龍峽嘅勇士激流有「中國第一勇士漂」之稱,特點係落差大、急彎多,刺激十足但又好安全。激流河道全長約5公里,全程落差達百幾米,落差位仲會逐步加大,愈後愈刺激,最啱帶埋部action cam去邊玩邊拍!

肇慶打卡必去熱門景點02: 智聯夢工場

位於肇慶嘅智聯夢工場,係個充滿夢想、機遇同創意嘅地方。因為佢獨特嘅建築風格,近期成為咗網紅熱門打卡點。場內有林林總總嘅初創小店/公司,包括創意咖啡小店、動漫文化公司及青年創意市集等…大家可以一邊打卡一邊飲住杯咖啡感受年青一代嘅生活品味。

肇慶打卡必去熱門景點03: 鼎湖山瀑布

鼎湖山一直都係出名嘅旅遊勝地,呢度有多條千尺飛流嘅瀑布,超級壯觀!去到感受一下由40幾米高崖頂狂奔往下飛瀉嘅瀑布景象,配襯埋翠綠嘅大自然景色,影相一流,非常值得到此一遊!


【GOGOAdvise Travel旅遊日記 現在徵稿】
歡迎來稿分享對旅遊、購物、美食、活動既情報。如蒙投稿,請寄 [email protected],另請附上照片一張及不多於80字撰稿人簡介,撰稿人可用真名或筆名。文章一經採用,或會將由Travel旅遊日記編輯部作潤飾,及會開設作者個人專欄。

Avatar
GOGOAdvise
一個集世界各地旅遊既資訊性平台
GOGOAdvise - Travel旅遊日記