主頁 > 最新旅遊情報 > 專門情報 > 【調查情報】 你有冇遇過? 最乞人憎飛機乘客龍虎榜

【調查情報】 你有冇遇過? 最乞人憎飛機乘客龍虎榜

古語有云:百世修來同船渡,我話下聯應該係:千世修來「坐隔離」!當大家共處於飛機艙呢個密閉空間,人與人之間互動變得更緊密,理應互常體諒,自己就當然唔好煩到人,好可惜,硬係有啲人永遠唔識得重別人的個人空間;好彩嘅話,一小時短途我都由得你,唔好彩 16 粒鐘 direct flight 飛紐約遇着佢哋,我想知,是咪我前世欠咗你。

話說美國 Expedia 進行第 4 屆「客機禮議」調查,「最討厭」冠軍同往年一樣,其他上榜行為亦驚喜欠奉,大家都見慣見熟,一句講晒,莽顧別人的人類及其行為,確實無分種族、國界、時空!

最乞人憎飛機乘客龍虎榜(第10位):美食飄香惹人厭 / 得票率:30%

聽落冇乜嘢呀可?親歷其境就知有幾困擾。試過上海返香港坐機尾,未起飛已經聞到「紅油抄手」嗰陣超強勁辣油加生蒜味,原來有旅行團團友拎外賣出嚟食,隔五行都聞到!冇~唔係唔畀人食嘢~係好想講句「點呀……」啫。

最乞人憎飛機乘客龍虎榜(第9位):座位扶手霸到實 / 得票率:34%

經濟客艙苦主先明:連位,就是連扶手都要 share。但請問阿隔離位,你憑甚麼好似皇帝坐龍椅咁「雅」實晒兩邊扶手?(憤怒咬唇)

最乞人憎飛機乘客龍虎榜(第8位):座位有得挨後 挨到盡 / 得票率:35%

座椅預設咗可以挨後,點解我唔可以挨到盡?呢個問題,其實等於口同鼻拗,宇宙係唔會得出共識的。但話說回來,挨後咗張凳,其實更容易被後座乘客頂到、出入時撞到、或直頭用你張椅背做扶手,係咪反而得不償失呢?

下一頁【最乞人憎飛機乘客龍虎榜 (第5至7位)】


【GOGOAdvise Travel旅遊日記 現在徵稿】
歡迎來稿分享對旅遊、購物、美食、活動既情報。如蒙投稿,請寄 [email protected],另請附上照片一張及不多於80字撰稿人簡介,撰稿人可用真名或筆名。文章一經採用,或會將由Travel旅遊日記編輯部作潤飾,及會開設作者個人專欄。

Avatar
我的旅遊日記
旅行會使我們感到靜默,但也能因此讓我們成為會說故事的人
GOGOAdvise - Travel旅遊日記