【教學情報】 旅行前必要知 飛機延誤或取消 旅保點先有得賠？

平日返工就想打8號風球，但去旅行就慘啦，隨時面臨飛機Delay 、被迫滯留機場、甚至取消航班等情況，唯一安慰的是，買咗旅遊保險嘅，都叫有得claim錢，補償延誤損失。不過有得Claim都要睇情況，好多時都係魔鬼在細節，就等我地幫大家一一拆解。

飛機延誤或取消 點先有得Claim？

Q1。因惡劣天氣令飛機延誤，旅遊保險會保啲咩？

A。大部分的保險公司都列明，如飛機起飛時間延誤超過6小時（各公司不同），將可獲現金津貼，就以宏利保險為例，若延誤時間超過6小時，將可獲$250現金津貼，甚至因此需額外購買手機充電器，都可獲緊急購物津貼。記住問航空公司攞延誤證明，保留登機證及訂機票的證明。

Q2。若回程時飛機延誤，又可以點做？

A。除Q1的現金津貼，可申索額外的海外住宿費用。以藍十字保險為例，他們同樣以延誤6小時為單位，最高可獲$2,000津貼租住海外酒店或申請轉乘其他公共交通工具的費用津貼，不同計劃可享不同程度津貼。但假如你已經在機場入咗禁區，航空公司未必准許再離境，有津貼都無用。

Q3。如因惡劣天氣而取消航班，旅遊保險會賠嗎？

A。每間不同，當中最差情況是恆生的旅遊保，寫明投保人不可以得到賠償，但大部分公司都會賠償，如藍十字寫明因航班延誤10小時而取消行程，最高可賠償$3,000。

Q4。如果因Delay令我駁唔到轉機航班，又點賠？

A。旅遊保險只保障啟程延誤而非抵達延誤，所以只能Claim 飛機延誤超過5小時的現金賠償。不過，如啟程和轉機航班屬同一間公司，不妨要求航空公司安排下一班最快出發到該目的地的航班，或安排住宿。

Q5。如回程延誤導致過了保單的保障期，是否需要另買一份保險？

A。如因突然事故無法於保單保障期內回港，公司會自動延長最多10天保障期，不過最穩陣當然是向航空公司取回書面的延誤證明，回港後再索償。

點樣向保險公司索償？

如果因為惡劣天氣而遇到旅程延誤或取消嘅情況，你除咗要填寫索償表格外，仲要記得向航空公司索取證明信，信上要寫明航班因為惡劣天氣而延誤或取消。

此外，如果你要額外花錢訂酒店、乘搭交通，甚至另買機票，咁就要留起住宿費用嘅收據、整個旅程嘅所有登機證及其他交通費用嘅收據，以便遞交保險公司作索償證明。

了解旅遊保險保障類別

去過旅行都知，旅行最常遇到嘅意外或變數就係航班安排。特別係廉航本身好少自置飛機，超賣情況亦嚴重，所以好容易出現航班延誤甚至取消嘅問題，令旅客行程受阻。要了解旅遊保險保唔保障航班變動，就要留意保單中旅程延誤及取消旅程2大保障類別嘅詳細條款。

比較保單價錢及保額

購買旅遊保險之前，最好了解吓個計劃係會保啲咩支出，通常都係機票住宿同旅行團費用。大家亦要留意保額上限，買返適合自己嘅旅遊保。

最後，點都提醒大家，不同旅遊保險計劃都有許多不同的條款同細節，如有時間最好都係了解清楚再決定是否購買，免得日後發生爭拗。例如，有部分旅遊保險計劃指明，在旅程延誤下，只能在「現金賠償」或「旅程延誤引致的費用」中，二中選一來得到賠償。又例如，有部分旅遊保險計劃規定行程延誤只保障一程，即所謂的「啟程誤點」，例如旅客要去德國，當中要在北京轉機，如果在轉機時在北京遇上打風而出現延誤，投保者在該程延誤的開支便不會獲賠償。

這些細節，如不事先留意清楚，Touch Wood遇上旅程延誤，心情不好之餘，若然連預計收到的賠償都有落差，那就變成禍不單行了！