【香港情報】 香港明年擬修例 全面打擊Airbnb 最高罰款提高至50萬或監禁3年

日本於今年6月9日通過《住宅宿泊事業法》，日本既業主可利用Airbnb等平台出租房間，以每年不得出租超過180日為限，預計最快下年就實施，為共享經濟拆牆鬆綁。

正當全球都興起Airbnb風，大家去旅行都多咗呢一個選擇之時，香港又再度諗住滯後喇！話說繼打擊完Uber之後，香港嘅創新科技局已經被唔少網界巨人狠批，不過低處未算低，近日民政署就話明，下年會修例，打擊無牌旅館。其實無牌旅館就不嬲唔合法，不過Airbnb其實唔算旅館，當係「民宿」，原本政府都無乜特別去打擊，但宜家開晒口話會連Airbnb都唔放過。

政府話，新例會加入環境證據，即係話如果該入處地點喺網上賣廣告、出示價目表、房間照片等，就已經係當「無牌旅館」，新例一出，所有本港出租Airbnb嘅都會納入「無牌旅館」之列，目前就有超過300間之多。署方就期望新例可以有效減輕牌照事務處舉證壓力，對無牌旅館真正既擁有人及同經營者提出檢控。經營無牌旅館的最高罰款會由20萬元增至50萬元，監禁期由2年提高至3年。新例亦會賦權民政事務局局長向法庭申請搜查令，姐係話，可以容許執法人員進入，或在有需要時強行進入懷疑無牌旅館。

唔少網民都反對呢個措施，覺得政府係行緊後波，同世界潮流成相反咁話。咁又係呀，酒店業近年牙痛咁聲，話少咗好多生意，加上Airbnb搶埋年輕客人，香港酒店業主聯會執行總幹事指出，係Airbnb出租房間以平價招徠，對四星、三星以下酒店影響最大，即使舉報成效亦不大，業界大致歡迎修例，政府唔做嘢保障下呢班大財團，都唔得啦。創新科技？慢慢等下啦香港人！