平時去旅行或者出差，大家買機票嗰陣，有冇留意到帳單入面其實默默包咗一筆「香港飛機乘客離境稅」？話說香港國際機場嘅離境稅已經調高咗至港幣200蚊。如果符合特定情況，例如買咗機票最終去唔成，或者喺香港轉機、過境，其實呢筆錢係可以申請全數退返架！今日就同大家詳細整合最新嘅網上退稅攻略，睇吓點樣可以輕鬆拎番呢筆洗費。
一、邊幾類人符合退稅資格？
根據本港法例，只要你年滿12歲並搭飛機離開香港，一般都要繳交離境稅。不過，如果符合以下三種情況，就可以申請退款：
直接轉機旅客： 搭飛機抵達香港後，喺同一個曆日內（即當晚11點59分前）轉機離港，且全程無離開過機場禁區。如果分開買咗兩張機票而第二張被重複扣稅，就可以申請退回。
過境旅客： 抵港後喺24小時之內搭機離開香港。同轉機唔同嘅係，過境旅客喺候機期間可以入境香港（例如出市區食飯或過夜），只要總時數唔超過24小時就得。
買咗機票但無飛（No-Show 乘客）： 呢個最常見！無論係私人理由臨時取消、病咗，定係航班延誤／取消導致你最終無登機，只要實質上無用過張機票離港，你名義上代政府預繳嘅$200離境稅就可以拎返。
二、2026最新網上退稅手把手教學
以往大家去機場可能會去實體櫃檯搞，但留意番：機場嘅實體離境稅退款櫃檯已經全面取消，依家一律要上網搞！大家必須喺離港日起計 28個曆日內 透過機管局官方平台提交申請。
第一步：準備證明文件 準備好旅行證件（護照／回鄉證資料頁）、電子機票收據（要清楚列明已付「香港飛機乘客離境稅 HK$200」）以及登機證（如適用）嘅電子檔（JPG/PNG/PDF）。
第二步：登入官方平台 前往香港機場管理局嘅官方網上退稅平台。
第三步：填寫個人及航班資料 輸入英文全名、電郵、電話，以及相關航班編號同日期。
第四步：上載文件並揀退款方式 上載啱啱準備好嘅檔案，並揀選收款渠道（可選信用卡/扣賬卡、Alipay、WeChat Pay或機場現金領取）。
第五步：注意提交位置超重要細節： 系統規定申請人必須身處香港國際機場禁區範圍內，網上平台嘅「提交」掣先至會生效！如果喺屋企禁區外撳係提交唔到架。
(註：如果係經大灣區「海天中轉大樓」抵達香港機場轉機嘅旅客，就要喺碼頭拎定退稅券，直接喺中轉大樓嘅實體櫃檯現金退款，不能使用上述網上平台。)
三、三個常見避坑貼士
手續費係咪任人收？ 唔得架！根據法例，航空公司或旅行社退還呢筆政府離境稅時，絕對唔可以扣除任何行政費或手續費。如果遇到被無理扣錢，記得向民航處反映。
收據睇唔到稅項明細點算？ 部分網上旅行社（OTA）張收據只寫一個總數。如果無獨立列出$200離境稅，記得先搵返原購票機構攞番詳細費用結構清單，否則平台好難批核。
No-Show 搵邊個穩陣？ 如果你係完全無去到機場，最直接其實係聯絡原先買機票嘅航空公司或旅行社，順便一併處理其他可能退到嘅燃油附加費或機場建設費。
大家以後如果遇到行程有變或者分開買機票轉機，記得唔好嘥咗呢筆錢，記得喺限期內上網申請退稅啦！
【GOGOAdvise Travel旅遊日記 現在徵稿】
歡迎來稿分享對旅遊、購物、美食、活動既情報。如蒙投稿，請寄 aeronautmediacompany@gmail.com，另請附上照片一張及不多於80字撰稿人簡介，撰稿人可用真名或筆名。文章一經採用，或會將由Travel旅遊日記編輯部作潤飾，及會開設作者個人專欄。
