主頁 > 最新旅遊情報 > 【酒店情報】 宜蘭晶英酒店 小朋友揸林保/法拉去CHECK-IN?

【酒店情報】 宜蘭晶英酒店 小朋友揸林保/法拉去CHECK-IN?

帶小朋友出門可以話唔係一件容易嘅事,有好多因素要考慮:
1.最緊要就係有無野啱小朋友玩,例如去日本韓國shopping之旅小朋友可能會悶,如一家大小出門可以選擇有渡假設施、有主題樂園,有得比小朋友放電嘅地方。2.當地嘅食物啱唔啱食 3. 當地天氣,如首次同BB或小朋友出門可以選擇一d和暖少少嘅地方, 唔洗帶咁多衫避免論盡情況 4. 飛行時間嘅長短,如第一次出門可先試試去一d 近d, 唔洗坐太耐飛機就去到嘅地方, 計劃假期時唸過泰國, 越南, 澳洲等等…

一直都知道台灣有好多好正嘅親子酒店,今次多得朋友仔介紹 我哋”猛”車邊預約到間。小朋友去到一定會心心眼嘅酒店, 所以就決定去台灣!我同爸爸都係進取型鍾意搭早機,同埋時間許可的話都會搭吓平時唔係成日搭到亦係羲廷最鍾意嘅機鐵。

去到機場歎早餐睇飛機就成為第一個節目

第一時間安頓好佢個好兄弟 唔係講緊羲穎 而係情同手足嘅貓貓

由桃園機場到宜蘭車程太約100分鐘, 建議出發前先預約旅行車接送. 出租車公司一般會用Volks Wagen麵包車接旅客, 到宜蘭車資約2700台幣. 今次爸爸搵到間聲稱全台唯一嘅出租Alphard嘅公司, 車資高一點約4千台幣.

啱啱好瞓醒一覺就到晶英酒店 (http://www.silksplace-yilan.com.tw) 呢間酒店直情就係小朋友嘅玩樂天堂!

入住8樓/ 9樓 每間房會包一架車 如多過一個小朋友亦可另外比錢租多架. 基本上你數得出嘅跑車款都有 林保堅尼, 法拉利, 保時捷, BENZ跑, MINI咩都有 隨時換車都得!

呢度就係租車房外面 每日3點開始可以租車 多人時就喺門外排隊

揀好戰車 工作人員會幫架車入電 揸到無電時就可以返車房換電

所以羲廷講得最叻就係: 麻煩你 我的車沒電啦 可以換電池嗎? (平時學校學嘅普通話大派用場^^)

車上都有安全帶 出發前姐姐都會細心幫小朋友檢查

小朋友可以沿住整個樓層玩 車就泊喺房門口 好型!

8樓有個戶外車場連遊樂場 有彈床 有2條成層樓高嘅滑梯

羲穎仲細就無太多選擇 一般嘅跑車佢都未玩到 只有呢幾架綿羊啱佢  

場內會有唔同嘅交通指示 紅燈真係要停㗎!

酒店房除左有嬰兒床提供 仲會有個帳篷比小朋友瞓 羲廷一見到即刻開心到跳入去! 

玩左成日仲未夠喉 兩兄弟沖完涼又喺床上面碌黎碌去玩一大餐 精力無窮!

晶英酒店真係一個好啱一家大細住嘅地方, 8樓9樓客房有得玩車,而6樓就係check in大堂。有好多遊客都慕名而來食櫻桃鴨嘅中菜廳, 亦有西餐廳(食早餐嘅地方),一落到4樓仲開心因為全層都係餐廳同food court,日本料理最多有炸物料理、有ShabuShabu火鍋、有和民、有拉麵等等…另外仲有韓式泰式中式意式料理,我們第一晚就book咗位食shabushabu,記得早少少打去預約,又或者食完lunch路過訂定先,因為walkin多數都無位。

同小朋友出門,我都會幾著緊一日幾餐食D咩,所以出發前都會做定功課。如果帶小BB出埠 我會帶旅行飯煲 可以每日煲新鮮飯仔粥仔, 到埗後就去超級市場買番薯, 甘荀, 薯仔, 瓜菜類放飯面蒸, 同埋買新鮮生果刨蓉比BB食。另外都會帶定一樽樽嘅BABY FOOD有時會坐熱mix埋飯仔一齊食,大個少少嘅小朋友就多好多選擇,拉麵烏冬意粉飯Pizza麵包咩都啱食,唔熱氣唔好太多煎炸就ok, 所以呢兩日如果唔出去其他地方都有大把選擇。

酒店地下至3樓都係商場 趁哥哥玩緊車 我就同羲穎四周逛逛, 有間超級大嘅UNIQLO. 宜蘭嘅天氣比想像中更溫暖 所以即刻買返兩件短TEE比爸爸, 地庫果層有太和工房 賣水樽保溫樽杯, 我喺呢度掃左好多貨除左顏色靚 物料仲好好, 終於都比我搵到有成880ml嘅暖杯! B1地庫有間超級大嘅家樂福 行幾個鐘都唔會行得完, 仲有款手推車比小小朋友/BB坐. 記得要落返停車場果層先會搵到㗎, 台灣嘅麵包真係又平又好食平時$17 先得5粒嘅麻糬波波 呢度$68台幣有5個! 仲有好多好多其他款式 買左一大袋 多到食包都飽 HAHA!

呢度仲一大個GAME CENTRE 兩兄弟玩到唔願走,  細佬最鍾意呢架小火車 一共玩咗3次^^

臨check out前果朝終於都比哥哥等到呢架跑車, 因為呢架可以行得好快 又有音樂 對門又真係開得 好多小朋友都等住坐呢架. 如果一早比人mark咗就要等果位小朋友唔玩換車或check out先有機會坐, 大家認住呢架車 睇吓有無機會遇到啦

——————–

宜蘭晶英酒店香港代理

我想去旅行I want to Travel by iwanttotravel.cc

電話: 852-27830881 電郵: package@tungnam.com.hk
Whatsapp: +85265574001 Line/Wechat: TNT27830881
Facebook Messages http://m.me/uWantToTravel


【GOGOAdvise Travel旅遊日記 現在徵稿】
歡迎來稿分享對旅遊、購物、美食、活動既情報。如蒙投稿,請寄 travel@gogoadvise.com.hk,另請附上照片一張及不多於80字撰稿人簡介,撰稿人可用真名或筆名。文章一經採用,或會將由Travel旅遊日記編輯部作潤飾,及會開設作者個人專欄。

GOGOAdvise - Travel 旅遊日記