主頁 > 最新旅遊情報 > 【台灣情報】 珍珠軟度/茶味/性價比 邊間正? 6間連鎖台灣珍珠奶茶大比拼

【台灣情報】 珍珠軟度/茶味/性價比 邊間正? 6間連鎖台灣珍珠奶茶大比拼

台灣有好五花八門嘅美食,但講到台灣嘅「國寶」,就一定非珍珠奶茶莫屬!但台灣珍珠奶茶店有咁多間,肚只得一個,應該點揀好?唔洗煩惱喇!今次精選咗六杯嚟自唔同大型連鎖店嘅珍珠奶茶作比較,為你實測邊一杯最好飲啦!

今次精選咗六間大型珍珠奶茶連鎖店,包括五十嵐、春水堂、喫茶趣、迷客夏、茶湯會同埋翰林茶館。今次會以珍珠Q軟度、茶味同埋性價比作比較。

五十嵐

珍珠Q軟度:★★★☆☆
茶味:★★★☆☆
性價比指數:★★★☆☆

五十嵐遍佈台灣所有角落,無論你身在台北、台中抑或台南,都可以見到佢嘅蹤影!其實五十嵐最初只係路邊一個攤仔,後嚟越做越好,台灣各地分店越開越多,而家已經成為台灣珍珠奶茶嘅龍頭之一。

五十嵐嘅珍珠奶茶茶味唔會好濃,但亦都唔會好似水咁淡而無味,係帶少少清新嘅茶葉香同奶香,適合唔鍾意茶味太濃、味道太甜嘅人。而珍珠部分,五十嵐嘅珍珠比較細粒,Q軟度適中。一杯珍珠奶茶價錢係NT$35(中杯)、NT$50(大杯),非常抵飲。

茶湯會

珍珠Q軟度:★★★★☆
茶味:★★★☆☆
性價比指數:★★★☆☆

茶湯會係另一間台灣大型手搖飲料連鎖店,台灣各地都可以見到佢嘅蹤影!截自2016年,全台灣已經有260間分店,但其實茶湯會喺2005年先正式創立,短短十多年間已經迅速擴展,一定有佢嘅過人之處!

講返珍珠奶茶先,茶湯會嘅珍珠奶茶茶味偏濃,珍珠細細粒,不過或者珍珠比較細嘅關係,容易煮得Q軟,仲可以一啖吸入好多粒珍珠!價錢方面係NT$49一杯,22安士。

迷客夏

珍珠Q軟度:★★★☆☆
茶味:★★★★☆
性價比指數:★★★★☆

引用台灣用語,要數近年最「夯」嘅台灣珍珠奶茶,迷客夏一定榜上有名!迷客夏喺2007年先立,主打天然同手作!迷客夏嘅珍珠奶茶比起其他飲品店有少少唔同,係選用伯爵紅茶,茶味會比較濃郁,同時香味四溢,未飲聞到陣茶香已經令人垂涎三尺!

另外,佢哋堅持用自家「牧場直營成分無調整」嘅鮮奶,奶味好香;而佢哋選用白珍珠,尚算Q彈,但小編比較鍾意黑珍珠,比較有咬勁。價錢方面,一杯珍珠紅茶拿鐵要NT$55(中杯)、NT$60(大杯)!

喫茶趣

珍珠Q軟度:★★★★★
茶味:★★★★☆
性價比指數:★★★★☆

相信大家對天仁茗茶都唔會感到陌生,而第五名嘅喫茶趣其實係天仁集團旗下嘅品牌,佢同天仁茗茶嘅分別係,天仁茗茶專賣飲料同茶葉,而喫茶趣就好似一間餐廳咁,除咗有飲料提供,仲有食物、甜品等等。

台北、台中同高雄都有喫茶趣嘅分店,喫茶趣嘅珍珠奶茶茶味帶點清新感覺,味道並唔會好強烈濃郁,而且可以選擇少糖、半糖或者微糖,可以因應自己口味選擇甜度,非常貼心,抵讚!而珍珠方面,大小適中,非常有彈性!價錢都唔算貴,中杯NT$50,而大杯就要NT$60。

春水堂

珍珠Q軟度:★★★★★
茶味:★★★★★
性價比指數:★★★★☆

排名第二嘅春水堂同茶湯會一樣都係嚟自春水堂集團嘅品牌,不過春水堂歷史更加悠久,早喺1983年經已成立,原名叫「陽羨茶館」,1988年先改名為「春水堂」,並沿用至今。

春水堂嘅名堂早喺1990年代打響,佢哋聲稱係珍珠奶茶嘅創始者(春水堂同翰林茶館同樣聲稱係珍珠奶茶嘅始祖,更曾經入稟台灣法院,最後因為兩者都冇註冊商標權或申請專利權,而令到珍珠奶茶成為台灣嘅國民飲料)。不過亦都多得春水堂同翰林茶館,現今大眾先有口福可以品嚐到珍珠奶茶!春水堂對食材非常講究,首先佢哋用茶葉沖泡,唔係用茶粉代替。其次,珍珠以純天然樹薯粉製成,無任何防腐劑添加。

茶味香濃,珍珠Q軟,小編誠心推介!一分錢一分貨,價錢方面略貴,而且唔同分店有唔同價錢,以北部為例,珍珠奶茶細杯要NT$85,中杯就NT$160。

翰林茶館

珍珠Q軟度:★★★★★
茶味:★★★★★
性價比指數:★★★★★

翰林茶館係台灣珍珠奶茶嘅老字號,早於1986年已經創立,創立人當年喺市場見到白色粉圓,於是靈機一觸將粉圓加入奶茶之中,發明咗珍珠奶茶!提到翰林茶館最出名嘅飲料,就一定係熊貓珍珠(黑珍珠同白珍珠兩溝)。

翰林茶館嘅茶都係由原葉沖泡出嚟,堅持唔用茶粉,亦都唔用來路不明嘅雜牌茶,所以茶味獨特又清新。翰林茶館同時提供黑珍珠同白珍珠,黑珍珠口感較Q軟彈牙,白珍珠比較軟身,「軟中帶Q」!價錢方面都唔太貴,大杯NT$65、特大杯NT$80,性價比高!

最後特別推介 全台只此一家

陳三鼎黑糖青蛙鮮奶創始店

陳三鼎位於台北公館商圈,全台只有一家!其實附近還有兩家同樣頗有名的「墾丁蛋蛋ㄉㄨㄞ奶」及「巴伯Q奶」,不過陳三鼎的名氣最大,因為它是「青蛙撞奶」的始祖,青蛙撞奶即是在黑糖珍珠中撞入不加水的鮮奶。飲品的甜度不能選擇,所以要有心理準備口味偏甜!但可選正常冰、少冰或走冰,如果少冰或走冰想補鮮奶填滿,需另加錢。


【GOGOAdvise Travel旅遊日記 現在徵稿】
歡迎來稿分享對旅遊、購物、美食、活動既情報。如蒙投稿,請寄 aeronautmediacompany@gmail.com,另請附上照片一張及不多於80字撰稿人簡介,撰稿人可用真名或筆名。文章一經採用,或會將由Travel旅遊日記編輯部作潤飾,及會開設作者個人專欄。

GOGOAdvise - Travel 旅遊日記