【另類玩法】 去墾丁唔想玩水有咩玩?

講起墾丁，個個都即刻諗起陽光與海灘、水上活動之類，其實墾丁仲可以悠閒地上山，唔洗濕身地下海，仲有得玩下火。

鵝鑾鼻燈塔 加 海邊步道

相信呢個墾丁地標都唔洗多介紹，驚喜嘅係誤打誤撞發現咗條海邊步道，只要沿住燈塔左邊繼續行，就會見到有條小路，沿路有不同指示牌，可以行去睇下古洞或者奇石。

台灣最南點

從鵝鑾鼻再向上靠右行就到達台灣最南點，左邊望向太平洋，右邊係巴士海峽，又長又闊嘅海平線，從咩角度影相都好好睇，如果黃昏去，睇埋日落個景就最Perfect!

恆春出火區玩火體驗

出火區係恆春鎮個邊，離墾丁再遠啲，電動車路程大約45分鐘，去出火區條馬路夜晚都好黑下，所以唔好揸太快啊。出火區出面係一個好似郊野公園嘅入口，門口會有人賣煙花爆谷，出火區不算太大，同埋本身有火嘅區域有鏈圍住，仲寫住嚴禁進入，但似乎已經係冇人會理lol 夜晚個度除咗火就冇其他燈照明，所以唔好忘記望下個天，好多星星!

睇極唔厭大草原

沿山路一路去佳樂水方向行，右邊就係大海景，左邊就好多相中嘅大草原，俾大自然包圍住嘅感覺真係好梳孚﹗仲有機會睇到梅花鹿，喺上山路之前會見到有間酒店sell佢地間特別套房會睇到梅花鹿 。