【香港情報】 雞蛋仔關注組，邊間最啱你口味？

雞蛋仔關注組

香港有美食天堂之稱，而且好多小食去到外國食唔返咁好味。講起香港地道街頭小食，除咗燒賣魚蛋之外，又點可以少咗香港人嘅童年回憶「雞蛋仔」呢！

由原味雞蛋仔，近年越出越多新口味，真係眼花繚亂啊！不過市面上雞蛋仔店咁多選擇，你哋又知唔知邊間先最好食呢？

今次小編為大家搜羅晒全港6大高質雞蛋仔鋪，當中有啲甚至得到「 雞蛋仔關注組 」極力推薦！想知道邊間值得一試，又有冇你哋嘅心水？快啲碌落內文睇啦！

雞蛋仔可以話係香港一個好特色嘅小食，

由於我哋個個細細個都係食雞蛋仔食大嘅，所以呢好多人都係雞蛋仔嘅食家。

當然每個人對於雞蛋仔嘅要求唔同，有啲鍾意蛋味夠濃，有啲鍾意外脆內軟，有啲又鍾意食吓唔同嘅味道。

而家嘅雞蛋仔已經唔係我哋細細個嘅單一原味，而係有好多唔同嘅花款：抹茶紅豆、朱古力香蕉、紫薯、芝麻…..甚至連豬柳蛋味都有，總言之林林總總，你講得出，都差唔多有。

以下嘅幾間雞蛋仔食店你有試過未，你又覺得邊間最好食？

1.媽咪雞蛋仔

講起「媽咪雞蛋仔」相信大家一定唔會陌生，曾榮獲米之蓮推薦，全港分店超過10間，港九新界去到邊總有一間喺你左右！超過20款口味，有原味、抺茶、咖啡朱古力、清香檸檬，仲有鹹味雞蛋仔，包括雙重芝士、芝麻肉鬆同麻辣肉鬆等。

小編喺廣華街嘅分店食過佢嘅夾餅相當之好味， 之後有叫過雞蛋仔都不過不失，但自從廣華街間舖搬咗之後，有食過其他分店，好似荃灣、上環、旺角啊咁，個夾餅做唔返以前嗰種味道， 雞蛋仔更加可以話係冇乜味。

所以而家若然食嘅話我都會揀呢個香蕉朱古力，起碼有返啲味，有返啲咬口，但就無外脆內軟嘅口感。

喺Facebook嘅雞蛋仔關注組亦都見到有類似嘅評價，有啲好有要求嘅更加話食咗一半就食唔落去，但亦都有見到有留言話黃埔嘅總店係保持水準，搵日都要去試一次。

2.利強記北角雞蛋仔

位於北角英皇道嘅「利強記北角雞蛋仔」曾經入圍16同17年米芝蓮街頭小食推介，由1991年開業起到依家已經有好多間分店，遍及港九新界，北角總店門面仲貼滿咗老闆同好多明星嘅合照。

呢間雞蛋仔就唔會搞咁多嘢，簡簡單單嘅原味，但做到外脆內軟。即叫即整嘅雞蛋仔真係好好食，加上用咗北京雞蛋，蛋香十足！如果鍾意食半邊空心、半邊有餡嘅雞蛋仔就一定唔可以錯過！不過見佢近年分店已經減少，早幾日經過尖沙咀嘅舖位已經冇開啦，今年疫情好多食店都結業。大家見到鍾意嘅店舖真係要多多幫襯！

3.葵涌廣場 串燒之王 

大家有無試過一行入葵涌廣場地下，就已經聞到好香嘅雞蛋仔同埋串燒味？

望落好伏😅但實際質素不輸出面嘅大檔！🤔咁我就一於試下！雞蛋仔熱辣辣！佢做到外脆內軟🤩而且好有蛋香！！😋😋值得推薦一下！👍🏽👍🏽

喺葵涌廣場地下嘅呢間雞蛋仔呢我認為係幾間雞蛋仔當中價錢合理，而且算係快靚正！

佢仲有一個鹹蛋雞蛋仔， 用鹹蛋黃製成，鹹度適中，口感鬆軟。聞落好香架，不過食落其實都唔係太過特別。

地址：葵芳葵富路7號葵涌廣場地下25A號舖

4.潮食

未行到潮食鋪頭就聞到陣陣嘅蛋香喇，好多學生哥放學經過都心思思要買嚟食！潮食最熱賣嘅款式一定係豬柳蛋雞蛋仔，食落粒粒雞蛋仔都包住大大粒豬柳肉！超足料嘅豬柳蛋雞蛋仔，散發住濃郁蛋香，咬落每粒都鬆脆可口，真係回味無窮啊！

地址：沙田乙明邨街9號地下乙明邨街市2-3號舖

5.摩芽雞蛋仔

摩芽除咗獨家嘅星星雞蛋仔，連外型都夠晒創新，又食得又打到卡！

招牌星星朱古力雞蛋仔係必食之選，每一粒雞蛋仔都加咗蜜糖星星脆米，朱古力味道特別濃，非常有咬口，層次分明！另外，唔鍾意食朱古力嘅朋友都可以一試芝麻同紫薯口味！

睇咗咁耐，除咗知道邊間好食之外，你又知唔知雞蛋最初嘅形狀係點嘅呢？

雞蛋仔變身成風靡全球的大熱美食，雖然時間唔算長，但作為香港傳統街頭小食嘅歷史，卻可以追溯至上世紀50年代。據已故香港掌故學者吳昊考證，雞蛋仔早於五六十年代，經已成為小販熱賣的街頭小食之一。

喺五十年代嘅香港，當時雜貨店為免浪費這些破裂嘅雞蛋，於是將麵粉同牛油等食材加入蛋漿裡，然後倒進模具烘焗；後來有人設計雞蛋狀的模具，於是被命名為「雞蛋仔」。

而有趣的是，當時雞蛋仔的形狀並非現時的一底，而是一粒一粒分開，有點像台灣的雞蛋糕。

雞蛋仔與戰後的歲月相關，展示香港『窮變通、變則通』的特質，昔日由食材到雞蛋仔是「從無到有」的變通，現在由傳統到新款是『從舊到新』的變通。」並強調，從雞蛋仔的今昔改變，已可體現香港人具創意、懂變通的特質。

而家有好多新開嘅口味我有啲鍾意傳統嘅人未必接受到但係若然啲後生仔鍾意嘅話都係一個唔錯嘅現象，起碼呢樣咁好味嘅香港特色小食可以繼續流傳落去