主頁 > 最新旅遊情報 > 【香港情報】 香港18區美食大搜查 上水有乜好食?

【香港情報】 香港18區美食大搜查 上水有乜好食?

雖然上水同大陸邊境只有咫尺距離,但其實都有好多啱香港人口味嘅美食架,唔講咁多,即刻出發去「搵食」喇!

上水區美食大搜查01: 碧姐泰國菜 地膽推介

上水巷仔街6號地舖

呢間泰國菜唔係好多人知,絕對係地膽而又鍾意食泰國嘢嘅人先會知架。有咩咁特別?因為餐廳唔止位置隱秘,藏於閣樓間,即使平時經過,但唔細心留意嘅話,都唔會發現。餐廳由泰國人主理,食物有風味,夠曬正宗。好多菜式都跟足傳統。加入唔同香料製作,令人回味。

上水區美食大搜查2:  榮昌茶座 香煎雞尾包

上水粉錦公路蓮塘尾村1號(近哥爾夫球場)

去呢度食嘢嘅通常都係行山或者踩單車嘅人,茶座係佢哋中途休息嘅落腳點。雖然似乎係獨市生意,但茶座嘅出品一啲都唔馬虎。坐低飲嘢食包唔少得,不過喺呢個茶座就要嘆得另類啲。

因為呢度有呃LIKE指度爆燈嘅「抹茶紅豆冰」同埋極少有嘅「煎雞尾包」!足料豬扒包一樣值得試,同澳門食嘅一樣滋味!望下隔離,竟然有燒乳鴿?好想食呀!聽講Lunch時間仲有「餐肉七色飯」,除咗有午餐肉,仲有火腿、煙肉、魚片、煎蛋、腸仔同埋雞翼,超豐富!

上水區美食大搜查03:  鴻淘士多羅太豆花 $12豆腐花放題

上水河上鄉快景路

$12蚊可以任食?係呀,你無睇錯。平時喺市區,食一碗豆腐花要$12,你都會照俾,但呢度$12就可以任食。$12放題唔只可以食豆腐花,仲可以飲豆漿,2樣一齊都得!真係好鬼抵。豆腐花可以自己鍾意加幾多糖都得,夠香甜又滑口,真係食得好爽!

上水區美食大搜查04:  椒鹽太陽蛋雞蛋仔 全港首創

上水智昌路8號順欣花園地下5C號舖

雞蛋仔款式愈來愈多,流心餡、配雪糕、配打邊爐食都有,但你又諗唔諗到雞蛋仔會「蛋中有蛋」呢?呢間「潮食」真係夠In,自創「椒鹽太陽蛋雞蛋仔」。

雞蛋食喺倒入蛋漿之後即刻加入去,之後就用雞蛋仔機烘熟,期間會加埋自製嘅椒鹽粉,散發住陣陣鹹香味。雞蛋仔大大粒,真係見到都流口水。咬開雞蛋仔,就會見到荷包蛋嘅蹤影,有蛋白同蛋黃兩種風味,好特別!

下一頁【上水區美食大搜查05~09】


【GOGOAdvise Travel旅遊日記 現在徵稿】
歡迎來稿分享對旅遊、購物、美食、活動既情報。如蒙投稿,請寄 aeronautmediacompany@gmail.com,另請附上照片一張及不多於80字撰稿人簡介,撰稿人可用真名或筆名。文章一經採用,或會將由Travel旅遊日記編輯部作潤飾,及會開設作者個人專欄。

GOGOAdvise - Travel 旅遊日記