【中國情報】 偽出國到「布拉格」｜歐式城堡、紅色鐘樓、哈利波特火車 零門檻打卡攻略

邊個話去歐洲先影到城堡㗎？

其實近近哋喺東莞，就有一個超夢幻嘅「歐洲小鎮」 —— 松山湖公園。

好多人以為入唔到華為小鎮內部就冇得玩，咁就錯晒喇！

只要喺松山湖公園嘅開放區域，隔住個湖影過去，景觀仲震撼、仲有電影感。

無論係同另一半浪漫打卡，定係帶小朋友放電，呢度都係100分嘅選擇！

打卡位逐個捉

打卡位1：松湖煙雨景區（大學路入口）

導航到「大學路入口」，呢度有8公里湖面同30公里綠道。
可以遠眺成群嘅歐式城堡，仲影到紅色鐘樓，成個畫面充滿歐洲氛圍感，係影大景嘅首選！

打卡位2：松湖煙雨景區（西入口）

呢度可以解鎖多重美景，紅色鐘樓加上歐式建築，浪漫到爆表！

打卡位3：康橋公交站

呢度有架哈利波特風格嘅復古火車，充滿「哈利波特」既視感
企喺橋上面等小火車經過（大約5至10分鐘一班），個畫面超有故事感，好似去咗倫敦國王十字車站咁！
如果黃昏時分配埋落日，成個畫面更加有feel～

打卡位4：查理大橋

環繞嘅橋身加上歐式城堡倒影，建議下午5點後過嚟影相，落日餘暉將橋身染成暖橙色，氛圍感滿分！
夜間更加有哈利波特視覺感，好似走入電影場景一樣。

兩日一夜親子路線規劃

Day 1
華為溪流背坡村康橋影相 → 松湖煙雨大學路出入口影相＋踩單車 → 入住松山湖凱悅酒店 → 泳池玩水＋泡泡大戰 → 黃昏時段松湖煙雨環湖散步 → 晚餐 → 返房浸浴缸睇夜景放鬆

Day 2
自助早餐 → DIY手工 → 放風箏 → 玩卡丁車 → 古荔枝林散步 → 湖邊露營吹住風食午餐

松山湖既有令人放鬆嘅靚景，又有方便舒適嘅配套，好適合喺廣州、深圳耐咗想唞吓氣嘅你～

松山湖凱悅酒店

泳池玩水

• 室內外泳池，設有專屬兒童池

• 下午3點有泡泡大戰，小朋友玩到癲

• 旋轉滑梯超級刺激

• 室內有3個恆溫池，室外仲有無邊際泳池，可以一邊游水一邊望湖景

兒童活動

• 室內遊樂園：有波波池等設施

• DIY風箏：自己設計再喺環湖草坪放飛，非常好玩

• 卡丁車：位於兒童營地門外，裝備齊全，放心玩

溫馨提示（交通＋裝備）

松山湖綠道長達30公里，仲有唔少斜路，揀啱交通工具好重要！

租車價錢參考：

單車：約$40／全日（適合體力好嘅朋友）

電動車：約$$30至$40／每小時（需押金，最推薦！慳力又輕鬆）

裝備建議：

防曬三件套：太陽眼鏡、防曬衫、遮（遮蔭位較散）

盡量唔好拉車仔入去，建議輕裝上陣

特別提醒：

華為小鎮係禁區，冇得入去，只可以喺外圍打卡

松山湖風景區資料

門票：免費！唔使預約

開放時間：全天候開放

小火車時間：08:00 – 18:00

地址：東莞市松山湖至誠路12號

交通：
從香港西九龍站搭高鐵到「東莞南站」，再Call車導航到「松山湖大學路出入口」

（圖片來源：小紅書 @龍逸同學、下野遛娃的丹、姐鄔的2次方、怪可愛的煎餅、阿年、小迪生活日記、Peter Sum）