最近香港人都非常之忙,因為電影界又好似蓬勃返起嚟,而且套套港產片都係好戲 ,繼古天樂嘅《明日戰記》熱潮開始,跟住大家都好熱切去支持香港電影,
前排嘅《冚家辣》同《飯戲攻心》,跟住又有《阿媽有咗第二個》,再有近期嘅《正義回廊》,全部都令香港嘅影迷睇得津津有味~
嚟緊11月24日正式上映仲有《過時・過節》
毛舜筠又做人阿媽啦!
早前上映嘅《阿媽有咗第二個》毛舜筠與姜濤同柳應廷合作,票房成績不俗。 今次做Edan嘅阿媽, 唔知會唔會一樣咁好票房呢?毛姐笑指:「《阿媽》好犀利,有4000萬票房,我不敢講,要看觀眾嘅支持。但希望部電影可以建立口碑,觀眾睇完能夠反省與家人之間嘅關係。」
咁又係嘅,尤其係中國人,好少同屋企人講心裏面嘅感受,最難以啟齒往往就係心底話,最易產生拗撬同誤解又係屋企人。 或者睇完呢套戲, 睇到一家客家圍村家庭的三代人,如何面對種種生活的困局, 會令自己能夠反省與家人之間嘅關係。
Edan喺《冚家辣》度,都係做人哋個仔,當時嘅爸爸媽媽係梁詠琪同鄭中基,而今次呢佢喺《過時・過節》呢套戲裏面就係做毛舜筠嘅仔仔,佢都坦言有啲壓力,因為入邊嘅角色唔係演佢自己,所以佢都驚自己嘅表現唔好,會影響咗成套戲,
edan 話:「今次個角色唔係大家熟悉嘅Edan,唔係《男排女將》入面嘅阿臣,唔係《大叔的愛》入面嘅阿田,阿陽呢個角色係一個好深入內在,好多層嘅角色,係從影以嚟遇過最困難嘅角色,非常真實,需要很深入去表現內心嘅多重感受。好彩劇組上下,仲有前輩毛姐嘅循循善誘,鼓勵我喺演出上作出不同嘗試,所以能夠參與呢部電影,對自己係一個好大磨練,令我非常期待電影上映。」
而毛舜筠自己亦好鍾意呢部戲,佢透露《過時·過節》係佢愛不釋手嘅一個劇本:「起初收到劇本時候,已經好喜歡裡面所講嘅嘢,家人之間嘅關係,都好似同我哋每一個人有關。呢部電影入面,爸爸媽媽同仔女之間係好真實,好似發生喺我哋身邊好真實嘅事咁。我相信大家睇完會好有共鳴。」
如果大家想睇嘅就快啲買飛啦,因為嚟緊陸續仲有好多好嘅港產片上映㗎!
《過時・過節》故事簡介
八年前的冬至飯局是一場混亂的開端,舅父因誤會與外婆關係破裂,就此拂䄂而去。早已躁動不安的爸爸情緒大爆發,舉刀恐嚇提出離婚的媽媽,結果兒子無法原諒父親,繼而離家出走。八年過去,一家人的關係仍然結冰。表妹忽然從英國回港,帶來了舅父的死訊,並希望促成一場冬至飯局,以圓死者遺願。久違的飯局邀請,令眾人檢視自身與家人關係,有人決定出走,亦有人選擇回來。面臨瓦解的危局,正好也是這個家庭修補關係的契機。
![愛旅遊的電話婷](https://gogoadvise.com.hk/travel/wp-content/uploads/2018/03/telephone-1-150x150.png)
鈴…鈐…鈐…
【GOGOAdvise Travel旅遊日記 現在徵稿】
歡迎來稿分享對旅遊、購物、美食、活動既情報。如蒙投稿,請寄 aeronautmediacompany@gmail.com,另請附上照片一張及不多於80字撰稿人簡介,撰稿人可用真名或筆名。文章一經採用,或會將由Travel旅遊日記編輯部作潤飾,及會開設作者個人專欄。