主頁 > 最新旅遊情報 > 各地情報 > 【香港情報】 香港18區美食大搜查 沙田有乜好食?

【香港情報】 香港18區美食大搜查 沙田有乜好食?

沙田同大圍,睇落去好似好舊,而且主要係住宅區,無咩好行。其實美食就在「人」間。愈多人住嘅地方,就愈多好嘢食!除咗一直出名好味嘅餐廳之外,近來愈來愈多新食肆進駐呢區,仲要間間都係好食架!今次就一齊捐窿捐罅,試齊區內嘅新舊美食啦!

坤記腸粉 新鮮滑溜加大件夾抵食的招牌腸粉

坤記嘅腸粉夠晒新鮮滑溜,加上大件夾抵食,難怪可以俘虜街坊嘅心!該店老闆話腸粉美味嘅秘訣--其實係夠新鮮!每日由工場分批製作,慢慢運過嚟。加上引死人嘅任添醬料,由師傅根據十多年的經驗調教出來,可以話係黃比比例!真係滑到一啜已經滑入口中,加埋炒香嘅芝麻,清淡得嚟好香口。而且真係好抵食,因為HK$11有6條,對於街坊嚟講係好正嘅選擇囉,仲可以任加添醬汁,尤其麻醬!加埋層次分明的腸粉,實在令人回味。

坤記腸粉
地址:大圍積富街石屋(近積德里)

千の味刺身壽司專門店 外形貌似深夜食堂

客人可透過店中細細的格仔向老闆下單,老闆站在店內與外面bar枱的食客聊天,大概聽到不少故事!而且壽司仲有好多款式,最出名就係火龍卷!其實即是蟹籽炸蝦卷,重點絕對是入面的炸蝦,炸得好香口酥脆。另外壽司飯夠黏潤,醋醃得剛剛好,唔會太酸!再加上少許沙律醬和豐盛的蟹籽,同炸蝦簡直perfect match!

千の味刺身壽司專門店
地址:大圍積運街海福花園商場地下31-C1地舖

鍋心粥底火鍋 平靚正海鮮粥底火鍋

呢度粥底火鍋採用嘅粥底堅持冇油、冇鹽、冇味精,食得健康之餘,仲可以突出到海鮮嘅原味,而全店淨係推出一個套餐,$198包你7款時令海鮮:蜆、鮑魚、蝦、膏蟹、魚等等,仲有5款自選配料,再加3款指定蔬菜,不設加一。唔洗200蚊就可以食咁多新鮮海鮮,真係好抵啊!

鍋心粥底火鍋
地址:大圍積存街14號地下

金城茶餐廳 街坊最愛肉餅飯

一定要試最出名嘅生煎肉餅飯!肉餅同飯嘅份量差不多,肉餅仲好厚身,無論點睇都好足料。肉餅煎得十分香脆,食落外酥內嫩,啖啖肉再加埋豉油,用嚟送飯絕配!另一推介椒鹽豬扒飯,豬扒份量好多,椒鹽味醃得啱啱好,豬扒本身唔會太乾太硬。食完肉餅飯仲想返屋企整嚟食,可以外賣生肉餅,畀你點煮都得。

金城茶餐廳
地址:大圍積福街100號

5.Cafe 1950歐陸餐廳 性價比高之德國豬手

呢到的德國啤酒咸豬手咸豬手大大份,仲切埋方便你食。豬皮炸到脆卜卜,肉質夠爽口,有薯條同沙律做配菜,好好食,另一推介西班牙墨汁魷魚筒燴飯,魷魚好煙韌,但唔會好似擦子膠咁,加埋燴飯,口感一流!到下午茶時段仲會提供30多款小食,平貴都有,定價$21至$50左右。

Cafe 1950歐陸餐廳
地址:大圍美林商場1樓

星期二薄餅皇 隱世Pizza高手

如果唔係去開呢度,都唔會諗到嗰度有個食Pizza嘅好地方!跟新城市廣場約有5-10分鐘路程,但食物質素和價錢絕對令你覺得「行遠少少都係抵」。Pizza係自家手工搓製,屬於薄批類;入口香脆,不油膩。餡料多,但油分處理得好,吃數塊都沒有感到很膩呢。焗意粉和小食也是值得一試的。想慳時間,方便啲話,可以喺去到店舖之前30 分鐘先打電話預訂!不過,記得記得,店舖係星期二休息架!

星期二薄餅皇
地址:沙田排頭村12號

屋子咖啡 主打日本同台式風情

鋪仔細細但設計精緻,係唔少年輕人嘅下午茶聚腳點!當中的和式櫻花梳乎厘加雪糕,一睇外形十分吸引,不過可惜食落無咩櫻花味,勝在焗得十分適中,軟綿綿得嚟又輕飄飄,而且蛋香十足。

屋子咖啡
地址:大圍積信街49號安信樓地下P號舖

Patisserie Tony Wong 堂食Tony Wong蛋糕

Tony Wong 西餅大師嘅大名好多人都知,不過啲舖頭通常都唔就腳,有時經過想買嚟試下,又要拎走,無位堂食,企都無得企。但係,原來喺沙田嘅分店有得坐喺度食!去開就要食返夠本。蛋糕超多選擇,不過小編覺得最靚嘅始終都係招牌嘅玫瑰花蛋糕——士多啤梨玫瑰花蛋糕!蛋糕手工精緻,花瓣其實是白朱古力,但弧線和形態都處理得很好,整朵「花」栩栩如生。蛋糕亦具層次,忌廉同海綿蛋糕以及餅底都配合得超好!

Patisserie Tony Wong
地址:沙田新城市廣場1期7樓704號舖

Dear Coffee & Bakery 即日手製無添加「堅」紫薯麵包

無諗過呢類咖啡店會喺大圍出現,店舖主打咖啡,提供輕食和一些自家製的手工麵包。不過,小編覺得最吸睛嘅一定係每日手製限量供應嘅麵包。由搓麵粉、做餡料、發酵,都係負責人每日喺店內即場搞掂,麵包真係好新鮮!紫薯包勁足料,中間嘅餡就係負責人親手用紫薯整成嘅蓉,沒加糖,沒加油!絕對是堅.紫薯包!除此之外,還有抹茶黑糖包、抺茶紅豆麻糬包、Oreo貝果及焦糖檸檬磅蛋糕等。

Dear Coffee & Bakery
地址:大圍積運街2-8號海福花園地下22號舖


【GOGOAdvise Travel旅遊日記 現在徵稿】
歡迎來稿分享對旅遊、購物、美食、活動既情報。如蒙投稿,請寄 travel@gogoadvise.com.hk,另請附上照片一張及不多於80字撰稿人簡介,撰稿人可用真名或筆名。文章一經採用,或會將由Travel旅遊日記編輯部作潤飾,及會開設作者個人專欄。

GOGOAdvise - Travel 旅遊日記