【香港情報】 拍拖唔一定洗好多錢 最新11月拍拖活動懶人包

好多情侶雖然無時無刻都想見到對方，不過日日去拍拖，個荷包都幾傷！但成日留喺屋企又會好快冇晒新鮮感。其實拍拖唔一定要洗好多錢，香港都有好多拍拖好去處架。（2018年11月更新資料）

11月期間限定活動: Clockenflap 音樂節

Clockenflap 音樂節每年都深受一班潮男潮女歡迎，在11月9日至11月11日都會有來看世界各地的Band及音樂人，來到西九舉行音樂會，回一回一班歌迷，今年仲有久休復出的台灣歌手安溥及蘇打綠主音的青峰參與音樂會。除了音樂會外，更有文青市集及不同美食，邊聽歌，邊食邊行市集，真係身心靈全方位滿足。

日期：2018年11月9日至11日
門票：HK$570-HK$1,720

11月期間限定活動: 色廊展Color Gallery

色廊展Color Gallery早前在台灣及內地大受歡迎，於11月2日終於登陸香港，在將軍澳新都城中心作出展覽。是次展覽不但會有濃濃少女味的粉系裝置，讓一眾少女及情侶盡情打卡，更會重現台灣著名景點-台北十分車站，讓一眾參觀者可以一邊放天燈，一邊留影。

在香港展覽，當然少不了具有香港色彩的裝置，在藍綠色的港式茶餐廳掛滿經典茶記招牌，以霓虹光管打造10多款懷舊宣傳口號的招牌，如：「外賣落單」、「內有雅坐」及「絲襪奶茶」等，帶大家回到60年代阿飛正傳的旖旎風光。如果在商場內消費指定金額，可參加夢幻花漾摩天輪工作坊或聖誕幻彩雲石畫工作坊，製作別出心裁的禮物，仲可以換領2款實用的限定禮品「潮型旅行喼」及「鬆一鬆睡眠頸枕，約定閏密及愛侶一齊去啦!

日期：2018年11月2日至2019年1月2日

11月期間限定活動: 微波國際新媒體藝術節2018

鐘意藝術的朋友，當然不能錯過「微波國際新媒體藝術節2018．穿越新種科技社會」，即日起至11月4日在香港大會堂展出以「萬有之有」為主題的展覽，當中共有7個作品，以穿梭過去與未來為題材，與你浸淫在與別不同的藝術氛圍中。除了7個展品，在展覽期間更會舉行不同的藝術表演，令參觀者更深刻體歐藝術。假日想離開都市的忙亂，不妨走進展覽享受寧靜，用藝術洗滌心靈吧！

日期：即日起至11月4日
開放時間: 12:00-20:00

11月期間限定活動: 荔枝角 D2 Place 新戲院：韓迷必去

韓國戲院品牌CGV Cinemas進駐荔枝角 D2 Place二期，場地設計成五、六十年代美國百老匯電影院，設有4個主題影院，包括全港首個270度投影技術的ScreenX影院、K Star 韓星主題電影館「孔劉館」、SweetBox及HSBC Film。

四個主題影院都各有特色，ScreenX影廳配備270度三屏全景放映、孔劉館顧名思義是以韓星作主題、Sweetbox影廳更設有情侶椅，而HSBC Film則設有設有伸縮的小桌，方便放置小食。

CGV更與HSBC匯豐合作，推出開幕優惠：
1. 憑滙豐信用卡於網上購票，可享有8折優惠及95折飲品及爆谷優惠！
推廣期：2018年9月13日至12月31日

11月期間限定活動: 馬哥孛羅德國啤酒節

11月仲有個啤酒節未完，與愛侶一起度過「醉」人的一天吧！

馬哥孛羅德國啤酒節 The Marco Polo German Bierfest

一年一度的德國啤酒節又舉行，推薦Erdinger艾丁格小麥啤(另有黑啤選擇)及拉格淡啤酒，配以德國美食，如燒豬膝配燴紅椰菜及芝士焗薯片（HK$185）、香煎紐倫堡式肉腸配酸椰菜及薯蓉（HK$150）等，仲有德國的樂隊 The Notenhoblers 表演！

日期：2018年10月17日及10月19日至11月10日
時間：6pm-11pm
地點：尖沙咀海港城馬哥孛羅香港酒店6樓海景露天廣場

票價：星期日至星期四: HK$160 (包括1杯啤酒)
星期五及六: $280 (包括1杯啤酒及1隻紀念啤酒杯)

中環街頭塗鴉藝術團

中環SOHO區大街小巷嘅牆上都有着有趣嘅塗鴉，但不說不知，佢地隨時係價值連城嘅藝術品，撞正星期日都無地方去，不如同另一半參加由「撞藝術」舉辦的中環街頭塗鴉藝術團，聽住導賞員講故事，邊同伴侶係塗鴉前打張卡，了解香港街頭文化外，仲可以呃like添。

日期：每週日
時間：早上11:00至中午12:00(英文團) / 早上11:30至下午12:30(普通話團) 
收費：$165
人數限制:1人成團，12人滿團
網站：http://accidentalart.co/zh/ (撞藝術) 

拍拖輕鬆行山景點：無敵夜景嘉頓山

一講到行山，平時冇咩做運動嘅另一半實會耍手擰頭，但其實香港有座山，唔使行一個鐘就可以到達山頂，仲飽覽九龍夜景，呢座山叫嘉頓山！而且，交通十分方便，只需喺深水埗港鐵站行10分鐘就到山腳。

建議路線：首先搭港鐵到深水埗站D出口，再向石峽尾方向行10分鐘左右，你就會見到嘉頓麵包廠，之後你會望到美荷樓旁邊有座山。沿住樓梯一路向上行幾個字已經有得小休同睇景，想睇到更全面嘅九龍全景就要行多幾個字，好快就會去到山頂，適合比較少做運動嘅情侶。

世外桃源：英式山頂花園 拍拖野餐勝地

唔好再話去歐洲先有靚地方Chill喇！比較鮮為人知嘅前港督別墅「後花園」就好似世外桃源，令你樂而忘返。擁有濃烈英式風格、古老維多利亞式建築嘅山頂公園，景觀十分開揚，入面有大草坪、維多利亞式涼亭、小山丘、水池，寧靜宜人嘅環境好適合情侶拍拖。鋪張野餐布、拎住本書、曬下陽光，寫意嘅生活有時就係簡簡單單。

建議路線：由山頂凌霄閣出發，沿著柯士甸山道（山頂餐廳旁）往上行，中途見到柯士甸遊樂場，繼續一直走就會見到藍白色守衛室，再行前多幾步，就到呢個世外桃源！

都市塵世美：金鐘添馬公園  

去野餐一定要去郊外，好多怕麻煩的小情侶都唔想去咁遠，但又覺得喺城市好難找到草地，才不是呢! 在城市中找野餐地點必定有金鐘添馬公園，地點便利，公園內一大片的綠悠悠草地，坐在草地上閒聊，看看書，也可以看到海，過悠閒寧靜的一天，也是另類的浪漫。

建議路線：港鐵金鐘站A出口，步行約7分鐘。

放狗放閃無問題：數碼港海濱長廊

好多伴侶都會一齊養小動物，假期去拍拖時都想帶埋「小成員」一齊去玩!  數碼港海濱長廊就不二之選，因為那裡準許放狗，與伴侶就可以坐在草地上看海，一齊坐草地吃小食，也可以看着「小成員」在草地上奔跑！就是無比寫意！

建議路線：搭港鐵到堅尼地城，轉小巴58M入數碼港。/ 到旺角山東街轉乘巴士970，直達數碼港。

踩單車：大埔吐露港單車徑近科學園

野餐可能有啲悶，都想郁動下，但又唔想行山咁辛苦，咁踩單車也是不錯選擇，由大埔租單車，慢慢一條直路踩入科學園，到科學園後又可以在園內餐廳，歎番個Afternoon Tea，再慢慢踩番大埔，沿途欣賞日落好風光。

建議路線：港鐵大埔站A出口，轉乘K17或71S總站，步行5分鐘到大埔海濱公園。/ 港鐵大埔站A出口，轉乘K18到廣福村，步行5分鐘至大埔海濱公園。

秘密日落觀賞點：石仔灣碼頭

「石仔灣」位於馬灣旁邊，係香港僅存嘅舊式漁村，嗰度有一連串嘅漁排及木橋碼頭，可一覽屯門公路以及西面海岸，係完美嘅日落觀賞點！喺度睇日落仲有另一個好處，就係可以遠離煩囂，靜靜咁同另一半享受難得嘅二人世界。

建議路線：由中環或荃灣碼頭乘搭渡輪至珀麗灣碼頭，再步行前往。

盡覽270度維港景︰海港城觀景台

海港城花近5年時間建造的全新觀景台「海運觀點」最近落成，10月23日開始已經免費開放予公眾參觀，觀景台可以飽覽270度維港景觀，亦設有兩個6,500平方呎的活動平台，其中一個更是天然草坪，另一邊則是石地，情侶可以盡情影相「打卡」。

開放時間︰早上7:00至晚上12:00
地點︰海港城大廈末端（鄰近郵輪碼頭）
費用︰免費入場

觀塘工廈一日遊

好多情侶閒時都會一齊行下商場、買下嘢。但你最近係咪覺得商場來來去去都差唔多，行到厭晒？咁不如試下去工廠大廈尋寶吧！

各區工廠大廈都有好多特色小店，好多時都係東一間、西一間咁散落喺唔同地方，而觀塘嘅「怡生工業中心」E座和G座就打通咗一樓全層，盡攬各式店舖，包括露營用品、護膚品、精品雜貨、美甲、樂器、波鞋、韓國貨等，應有盡有，地下仲有特賣場添，加上嗰頭又有好多平靚正餐廳，消磨一日半日時間絕對唔成問題！

齊齊潮做文青

最近大熱嘅「文青」風氣直捲香港，想嘗試過一日文青生活，不妨試下帶埋男/女朋友一齊試下坊間手作仔！當中以Art Jamming、整皮工作坊、押花班、咖啡拉花班等等最為受歡迎。如果想搵啲比較價錢合宜嘅班，可以搵下係工廈開嘅班，當中好多都係年青人創業嘅生意仔。講到小編都好想今個周末即刻去Join！

博物館

一聽到去博物館可能好多人都會覺得好悶。但其實而家博物館都唔係咁死板。香港嘅博物館逢星期三免費入場。例如去科學館就可以喚起好多人嘅童年回憶，同你嘅另一半重拾童真，玩下番梘泡、鏡子迷宮，都可以過一個輕鬆嘅週末。

而太空館兩個展廳「太空探索展覽廳」和「宇宙展覽廳」早前閉館一年半進行翻新，4月25日終於重開。展品由60多件增至百多件，7成都是互動展品，大家可以當新地方再玩過。

煮飯仔

如果你同另一半都鍾意食嘢，一齊煮飯仔就最啱啦！網上有好多簡易食譜，煮一餐見得人嘅飯冇難度！坊間都有啲網頁係幫你執齊晒一道菜需要嘅材料，送上你屋企，等你可以輕輕鬆鬆下廚，但價錢就會比較貴。一齊煮飯仔，製造自己嘅「心血結晶」，絕對增加情趣！不過最好就傾清楚邊個洗碗，唔係煮飯仔就變成嗌交啦！

宅在家

其實拍拖最慳錢就係唔出街，而兩個人靜靜地留喺屋企都可以好浪漫。一齊窩喺Sofa睇一齣戲（無論係荷里活大片定係個個星期日都有嘅周星馳），又唔使俾錢買戲飛同爆谷，夠慳！甚至有啲情侶會一齊打機 ，真正係寓娛樂於拍拖。

其實講到尾，好多時去邊都冇謂，重點係同你邊個一齊。就算唔用好多錢，都可以一齊創造美好回憶。