主頁 > 最新旅遊情報 > 專門情報 > 實用情報 > 【教學情報】 香港人用12306網購高鐵車票攻略

【教學情報】 香港人用12306網購高鐵車票攻略

高鐵(香港段)係2018年9月23日已經正式通車,香港至深圳福田站只係需要約14 分鐘;至廣州南站最快都只係47 分鐘,所以好多香港人北上玩樂、旅行或公幹都會選擇搭高鐡。雖然高鐵班次都算多,但如果你想係周末/假日高峰期北上搭高鐵,最好都係預早買車票穩陣啲。以下教你預早網上購票攻略,等你可以輕鬆睇住行程買到想要班次車票之餘,仲唔洗係特登去車站排隊購票,慳返好多時間。

依家要預先買高鐵車票, 除咗可以用港鐵網上購票系統,其實用中國鐵路12306網站更加方便全面。自上年12月,為咗方便香港居民,持回鄉證嘅旅客可以用電郵註冊12306賬戶,仲可以一次過喺網上完成實名驗證,唔駛好似以前咁再去車站搞一輪手續先用到12306個賬戶買車票。

12306網購高鐡車票必睇攻略 步驟1: 登記賬戶

香港人可以用回鄉證及電郵地址,上中國鐵路官方網上購票系統12306(http://www.12306.cn)登記賬戶。成個流程非常簡單。

網上登記流程懶人包 :

第一步 按【註册】填寫個人資料 (提提你: 香港人用電郵登記賬戶 一定要揀港、澳、台居民證件選項)
第二步 按【登錄】> 【查看個人信息】查看實名驗証結果 (通常24小時內會有結果)
第三步 到個人電郵,點擊啟動連結作電郵驗証*
第四步 登記完成

*提提你: 如果收唔到啟動電郵,可以到12306網站登入返你嘅賬戶 >【查看個人信息】> 點擊【驗證郵箱】重發啟動電郵

12306網購高鐡車票必睇攻略 步驟2: 網上購買車票

成功登記賬戶後,就可以隨時隨地上返中國鐵路官方網上購票系統12306(http://www.12306.cn),即時睇下自己想去嘅車站目的地、日期及班次仲有冇位,有位就即時可以訂購,唔需要再到香港西九龍站排隊或打電話查問。

網上購買車票流程懶人包 :

第一步 按【登錄】輸入個人名稱、密碼及進行登錄驗証
第二步 按【常用聯絡人】添加同行或其他旅客資料,因為有時可能要幫埋朋友、親戚買埋車票,唔需要每次再重新輸入佢地資料
第三步 按【車票】選擇(單程/往返) > 選出發地及目的地 > 再選日期
第四步 查看顯示班次、車程、剩餘座位及票價
第五步 按【預訂】付款購票

成個購票流程十分清晰,班次日期時間、剩餘座位、票價都一目了然,仲可以揀埋座位偏好,成個過程5分鐘內完成,等你可以喺屋企安心輕鬆預訂車票,唔洗再擔心買唔到周末/假日高峰期嘅車票。

12306網購高鐡車票必睇攻略 步驟3: 車站取票

喺12306網站成功購票後,持第二代回鄉證嘅旅客可以直接去香港西九龍站或內地車站嘅「12306自助取票機」取票,夠晒方便快捷。

如果持第一代回鄉證嘅旅客,就要到香港西九龍站內指定櫃位或內地車站櫃位取票。喺香港西九龍站櫃位取票就要比少少手續費,因為個櫃位係由代理公司提供服務。

額外12306網站預先購票實用貼士

1.下載埋中國鐵路12306手機APP
因為好多時,想買高鐵車票嘅時候,都未必有電腦係身邊,用手機上網站睇會幾辛苦下。下載埋12306中國鐵路手機APP,咁就真真正正隨時隨地買到車票喇!特別係你可以係旅程途中先用App買回程車票,玩樂同公幹都更有彈性,唔需要次次搵電腦買。

2. 一站式購買內地段車票 接駁行程更方便
用中國鐵路官方網上購票系統12306(http://www.12306.cn)購買車票,仲有一個好處,就係可以一次過買埋接駁內地段車票。

3. 買錯車票/行程有變 可以隨時改票或退票
預先購買車票後,發現買錯咗或者行程突然有變時,唔洗擔心,12306網站可以隨時俾你網上改票、甚至退票,而毋需到車站辦理,用app都做到,咁你買時就非常安心。


【GOGOAdvise Travel旅遊日記 現在徵稿】
歡迎來稿分享對旅遊、購物、美食、活動既情報。如蒙投稿,請寄 travel@gogoadvise.com.hk,另請附上照片一張及不多於80字撰稿人簡介,撰稿人可用真名或筆名。文章一經採用,或會將由Travel旅遊日記編輯部作潤飾,及會開設作者個人專欄。

GOGOAdvise - Travel 旅遊日記