主頁 > 最新旅遊情報 > 【香港情報】 香港18區美食大搜查 黃埔紅磡有乜好食?

【香港情報】 香港18區美食大搜查 黃埔紅磡有乜好食?

觀塘線延線已通車了,終於可以由新界極速去到黃埔搵食,清下張美食清單。其實黃埔紅磡一直都係個美食集中地,雖然有紅磡站,不過去食好嘢始終遠咗啲,

唔太就腳。宜家黃埔站嘅位置可以話係比紅磡站更紅磡,每個出口都總有美食喺附近,真係啱曬各位為食嘅朋友仔了!

1. Asobu Bistro 熔岩蛋包飯

地址:黃埔紅磡德民街29號德民大厦地下D3號舖
FB:https://www.facebook.com/asobubistro/

成日係網上見到日本嘅蛋包飯一切即流,每次睇完都會流曬口水。不過,呢個情況應該唔會再出現喇!因為香港都有餐廳供應呢種蛋包飯,就係紅磡咋!呢間餐廳開咗無耐,啲蛋包飯就立即成為「相機食先」嘅少男少女嘅頭號目標,頻頻排隊去食。

雞蛋未切之前震騰騰,由此可知裡面嘅蛋汁有幾咁澎湃!蛋皮很滑,用刀輕切,蛋汁開始湧出嚟,好似心太軟嗰種效果。最後用刀撥一下,啲飯就被蛋包住咗。值得一提嘅係,飯唔係白飯,而係炒過架,值得欣賞!

2. 三河屋MIKAWAYA 全港最正鰻魚飯

地址:黃埔紅磡明安街14號寶石戲院大廈地下D舖

鰻魚愈食愈貴,坊間唔少日式餐廳食個鰻魚飯動輒都百多二百元,質素亦參差。紅磡呢間小店嘅鰻魚飯有可能係全港全香港最好味嘅鰻魚飯,真係要嚟試下。

鰻魚大大塊咁舖喺沾上鰻魚汁嘅白飯上面,鰻魚勁厚身,又燒得靚,上面啲汁又夠,食落啖啖肉,又嫩滑,勁惹味,佐飯一流! 90蚊有找,真係要食多碗呀!

3. 深夜「宵」一燒 美味佳及千味燒

美味佳
地址:黃埔紅磡寶其利街2號

千味燒
地址:黃埔紅磡寶其利街12號地舖

食宵夜呢個動作雖然邪惡,但係有時餓起上嚟真係會忍唔到口。呢個時候可以嚟寶其利街食返轉宵夜。呢度有2間人氣小食店,一間就專賣串燒,一間就賣串燒之外,仲有雞蛋腸粉、車仔麵……燒燒賣都有,真係想食乜都有!

4. 魔法雞排 非一般雞排

地址:黃埔紅磡德民街1-15號地下A4A舖

自豪大大之後,呢間過江龍雞排店喺台灣一樣好巴閉,自2010年開業以嚟就已經開咗唔少分店,台灣以外,內地都有約200間。究竟啲雞扒有咩魔力?

原來一切在於自由選擇!由「醃味」、「炸皮」以至到灑上邊種「味粉」都可以由客人自己揀。人就係鍾意有得揀,唔怪得咁多人捧場。雞扒大大塊,食落外皮酥脆!炸完之後,雞肉都仲保留到肉汁,超juicy,咁咪俘虜到港人嘅味覺囉!

5. 牛肉拉麵 純手工拉麵

地址:黃埔紅磡明安街25號地舖

今時今日仲有人會喺店內現場即製拉麵!拉麵師傅每日親自喺店內打麵,麵條有寬麵、粗麵及幼麵三種選擇。為食小編點咗幼麵,麵條食起嚟好彈牙,有口感,就算食到最後嘅麵條,都無過稔,同平時食嘅唔同,手打即製果然係唔同啲!

6. 咖啡煮意 蟹迷必食

地址:黃埔紅磡馬頭圍道37-39號紅磡廣場地下67號

呢間咖啡店雖然話係Café,但原來內有乾坤!就係呢度可以變身做咖啡店私房菜館。當中最驚為天人嘅係呢個蟹肉凍餅!以為係蛋糕麵包咁簡單,咁你就大錯特錯!

其實呢個蟹餅極考工夫,因為要將蟹肉同蝦肉整碎,之後整成呢個糕餅形狀!層次豐富,上層有芒果同芝士混合物,中間就有蟹肉同蝦肉,最底層就係消化餅底,足料好味,蟹迷一定超鍾意!

7. 滿堂樂滬京風味 風味台式早餐

地址:黃埔紅磡明安街4號

有時星期六日想回味下台灣味道,可惜香港供應台式早餐嘅店舖絕無僅有。除咗蛋餅,你又懷念邊種台灣味道呢?「鹹豆漿粢飯」又會唔會係你嘅心水選擇呢?

在香港都可以食到鹹豆漿粢飯,真係令人感動。粢飯大件好足料,油炸鬼、榨菜同肉鬆都有,油炸鬼好脆!至於豆漿,有豆香,裡面都有油炸鬼同榨菜,另外仲加咗蔥花同蝦皮,溫度恰好,配粢飯食真係唔錯!


【GOGOAdvise Travel旅遊日記 現在徵稿】
歡迎來稿分享對旅遊、購物、美食、活動既情報。如蒙投稿,請寄 travel@gogoadvise.com.hk,另請附上照片一張及不多於80字撰稿人簡介,撰稿人可用真名或筆名。文章一經採用,或會將由Travel旅遊日記編輯部作潤飾,及會開設作者個人專欄。

GOGOAdvise - Travel 旅遊日記