女人一直遇到渣男，總有佢嘅原因
有人會覺得自己成日遇到渣男，係因為自己唔好彩啦，或者係前世欠左佢哋，有宿世嘅孽緣等等⋯⋯而通常佢哋呢都會羨慕周邊嘅朋友，點解人哋個男朋友或者人哋嘅老公可以咁完美，又靚仔，對老婆又好，又錫小朋友，而自己嘅男朋友冇上進心，唔搵嘢做，仲要貼埋錢俾佢，結咗婚嘅又唔顧家⋯⋯
你身邊有冇呢啲朋友仔呢？如果有，其係識咗好多年既話，有時聽到佢哋不停咁發牢騷，真係到耳仔流濃啊，跟住你就會慢慢回想起，其實係當初佢哋拍拖或者係結婚之前，已經勸過佢無限次，要同呢啲渣男分手，唔好再投入感情。但係往往佢哋都只係埋怨，轉個頭有繼續同渣男一齊。
唔通真係宿世姻緣？又或者真係咁唔捨得？如果係咁愛嘅話，就應該唔好埋怨，既然係你自己揀嘅就心甘命抵， 認命啦！唔好羨慕人哋嘅男朋友有幾好。
所以說到底，其實都係自己唔想放棄，覺得投入左咁多感情、時間、青春、金錢⋯⋯如果放棄好似好唔抵，好唔甘心，結果越踩越深，不能自拔，再加埋不停比較，令自己嘅能量更加負。
而身邊嘅朋友聽得你一次兩次，勸完你又唔聽講，其實再聽幾次都覺得係浪費時間，試問世間又有幾多個朋友願意無條件不停咁接收你啲情緒垃圾？
就算有啲好姊妹肯聽，人哋唔嫌棄你，自己講咁多次自己都覺得煩啦！
要遠離一次又一次遇到渣男嘅命運，奉勸各位女士，當感受到身邊嘅係有渣男嘅潛質，盡快斬欖。唔好再作無謂嘅投資同浪費寶貴嘅青春，要相信自己可以獲得更加好！呢個世界有吸引力法則，你覺得自己永遠遇上渣男你就永遠遇上渣男， 想遇上好的人，首要嘅條件係要先要愛自己，至會獲得合理嘅被愛～！
最愛探討女生世界!!
【GOGOAdvise Girl女生王國 現在徵稿】
歡迎來稿分享對戀愛、女生用品、女性話題既情報。如蒙投稿，請寄 girl@gogoadvise.com.hk，另請附上照片一張及不多於80字撰稿人簡介，撰稿人可用真名或筆名。文章一經採用，或會將由Girl女生王國編輯部作潤飾，及會開設作者個人專欄。
