五個你最討厭的男友壞習慣
食煙、飲酒、賭博就好多人都唔鍾意，但連睇波同打機都上榜？
雖然熱戀可以冚過一切嘅壞習慣，但係如果你男朋友確實係一個煙鏟，都真係幾難頂。每次一行近佢，已經聞到佢嘅煙味，好似入咗卡拉OK房咁，有時你可能懷疑究竟佢啲血係咪已經流緊尼古丁，遇上呢類男朋友，建議大家好好諗清楚，為自己嘅健康着想，遠離二手煙。就算佢唔喺你面前食，佢各樣嘅隨身物品其實都滲透住一啲有害化學物，對你自己身體都唔好。想有將來，一係戒煙先！
飲酒
如果佢酒量OK呢，都還可以，但係最怕有啲不自量力，自己唔飲得，下下飲到爛醉返嚟，又要照顧佢，接佢返黎分分鐘仲整到污糟邋遢，嗰一刻你變咗係佢阿媽，多個係女朋友。
賭錢
呢個都幾麻煩，尤其上咗引嗰啲同吸毒真係好近似。賭博嘅嘢好難話點到即止，好多時都將自己有需要嘅錢都放埋上去。作為身邊人，要過呢啲大上大落生活之餘，分分鐘仲要借埋錢出嚟都幾難頂。
打機
聽落好似冇乜嘢，但相信各位姊妹如果身邊個係好沉迷打機，都知道嗰種滋味！佢一投入左呢個打機嘅世界， 彷彿同外界斷絕接觸，其他人同佢講嘢都好容易令到佢發脾氣、覺得好煩，而佢一日未打完嗰鋪機，一日都唔可以出去行街食飯睇戲，莫講話做其他嘢啦。
睇波
呢個活動都好似最為健康，但係如果每一個星期六日都睇到半夜三間，仲要唔係同你睇，同班friend去睇，即係話逢親夜晚你就唔使旨意搵佢，第二朝佢都唔使諗住做啲健康嘅運動，因為佢都仲未瞓醒。如果鍾意運動嘅你喜歡同你睇一場半場都還可以，但我相信大部份嘅女仔都唔係特別鍾意睇足球，深夜時分，接近兩個鐘一班人就係為咗等入波嘅一瞬間， 都唔緊要啦⋯⋯但係有啲男朋友當自己個女朋友係阿四，要整晒嘢食服侍埋班豬朋狗友，自己睇完波就大覺瞓，整到屋企污煙漳氣。
最愛探討女生世界!!
【GOGOAdvise Girl女生王國 現在徵稿】
歡迎來稿分享對戀愛、女生用品、女性話題既情報。如蒙投稿，請寄 girl@gogoadvise.com.hk，另請附上照片一張及不多於80字撰稿人簡介，撰稿人可用真名或筆名。文章一經採用，或會將由Girl女生王國編輯部作潤飾，及會開設作者個人專欄。
