【 打卡情報】 香港4大睇日落+毛孩好去處～

毛孩最開心就係親親大自然，weekend得閒同佢地出去行下草地，吸下新鮮空氣，佢哋嘅身體都好啲啦！以下幾個地方都建議大家下午去，玩完順便可以同毛孩一齊影返張靚靚夕陽合照！

1.數碼港海濱公園

通常大家一聽數碼港個名都諗起嗰度已經變咗一個死城，又遠，又無野玩。但係死城都有一個好處，就係冇咁多人， 仲要呢個時勢， 都係唔好去啲咁多人嘅地方。想揸車去嘅話，假日都唔駛等就可以泊到車。

喺嗰度嘅大草地睇日落好舒服，亦都唔會有人喺你側邊起個巨大帳幕，養寵物嘅朋友亦可以帶埋毛孩一齊去，有好多唔同種類嘅狗仔，俾佢識吓朋友。

大家到草地野餐，非常適合打卡影相，更可以欣賞日落。

但係要去嘅話就建議大家都係帶自備食物去野餐會好啲，因為頭先都講過嗰度係變咗死城，所以餐廳選擇唔多，或者如果大家想話食一個有質素嘅hightea，亦都可以考慮Le meridien酒店，酒店內設有五間不同風格的餐廳及酒吧，包括Umami日本餐廳及多國菜Southside Bistro，放電後入住可醫飽個肚，露天嘅茶座係寵物友善添。

如果你隻毛孩好年輕，咁放電就啱哂，面對住無敵海景及大草園，公園佔地佔地60萬平方呎，有排玩。

2.屯門浩和街

呢度有港版邁亞美之稱，雖然配套就唔係好好，但係地方非常空曠，有一大片草地可以放狗、放風箏、比小朋友放電，而且呢度嘅日落好靚，好似有一個好大嘅鹹蛋黃喺你嘅面前，直頭係270度無敵海景看日落，正呀！

揸車去嘅朋友，附近無時租車位，可以暫泊喺草地出邊，但係要隨時留意抄牌。而且最好就去定廁所先，因為嗰度要搵廁所都唔係咁容易。而且附近冇餐廳，冇士多，記得帶備足夠食水，要野餐嘅話都係自備食物啦～

另外浩和街亦都係一個帶狗狗去玩同埋放風箏嘅熱點， 未去過嘅你，不妨體驗下港版邁阿密嘅風景。

3. 西九文化區

如果想約埋三五知己一齊玩，西九係一個好好嘅選擇，呢度配套完善，有餐廳同洗手間。而且草地嘅質素可以話係4個地方之中最好，人同狗狗都行得最舒服。唯一嘅缺點就係假日人會比較多啲，但係由於最近好多朋友都已經出咗去外遊，所以數量都還可以接受，比起最開初疫情嘅時候，成個西九好似難民營咁嘅情況已經有改善。

不過如果你都係想霸咗個靚位去睇日落嘅話，咁就要早少少啦～而且對住日落嘅位置會係喺熱狗舖 Hooman by the sea 對出嘅草地，嗰度可以話係最佳觀賞日落嘅位置。

而且早到亦都可以喺西九借吹氣梳化或者係太陽凳，舒舒服服咁樣坐喺度睇日落， 費用全免， 只要留低電話，確保五點四十五分前歸還就可以，借晒就冇㗎喇。 不過嗰度好多餐廳寵物都唔入得，大家可以叫外賣坐喺草地野餐。其中餐廳 「留白Livehouse」就容許狗狗坐喺最外圍，都算係可以坐喺餐廳堂食。

揸車嘅朋友可以留意番，西九文化區共有5個停車場，A、B、E、F區停車場，每小時收費為HK$28-32，皆位於香港故宮文化博物館或西九藝術公園附近， 睇日落比較方便可以話係E ，F區，因近故宮的B區泊車位置較少，而A區比較遙遠。而幾個停車場都有做泊車優惠，於指定餐廳、輕食店或美食車消費滿HK$200或以上，同日內憑收據正本可享1-2小時免費泊車。

4. 山頂

西高山出名係睇日落嘅好地方，從太陽剛開始落山，到太陽消失之後見到浪漫嘅晚霞，然後天空全黑，剩下萬家燈火，確實係一個非常美妙嘅過程。 山頂盧吉道雖然係輕鬆行山路線，不過要行上西高山睇280度港島海景加日落，起碼都要行三百幾級樓梯。如果體能狗狗年紀大，體能麻麻，其實唔使行到上去西高山一樣睇到靚嘅日落。

喺山頂廣場嘅頂樓有一個空中花園，喺嗰度正正可以望到海景日落， 睇完日落仲可以去最近啱啱翻新完嘅太平館餐廳度食飯。 如果想帶埋寵物度佳節，佢哋嘅露天茶座都係寵物友情㗎！