【旅遊情報】 溫馨提示：最常導致送機尾的4大原因～

相信大家去旅行都試過出現一啲驚險事，其中趕飛機一定係最心急如焚～

有人更加話趕到底褲都甩埋，屎淋尿瀨⋯⋯嗰種滋味真係令人心跳加速，分分鐘心臟病發呀～

雖然當刻可能會好緊張、好無奈，但係回想返，的確令人好難忘！（包括送機尾嘅傷痛）

唔好以為係冇去過旅行嘅大鄉里先會出現，有時分分鐘係去得旅行多，或者出Trip 頻率高嘅人出事，因為佢哋容易掉以輕心，所以亦會出現突發瘀事。

最近亦都有好多長輩因為仔女移左民，所以會搭長途機去探佢哋。有啲長輩以前後生營營役役返工，可能好少出遠門，最多都係去吓東南亞。

由於仔女都有個細路要睇住，所以有時兩老分分鐘自己搭長途機去探仔女，作為後生嘅，要溫馨提示一下佢哋，等佢哋能夠輕輕鬆鬆到達目的地呀。

1.凌晨機睇錯時間

其中好容易中招就係，凌晨機睇錯日子去機場，去到機場先知係昨天的航班⋯⋯

不過呢種蠢事只要做過一次，以後都會提醒自己，不再看錯， 個教訓貴啲咁解囉。

有人會笑呢啲人「24小時制都會錯，要重讀小學。」，亦有人話「自己生日又唔見會搞錯！一到00：00就等人message 生日快樂畀自己啦！」

2. Passport 過期

好日都唔出門，出門發現Passport 過期， 有時甚至去到機場先知道， 因為好多人唔記得咗要半年期， 以為Passport expiry date 未到就可以繼續用。 如果出發前發現， 仲有機會趕得切做快正嘅， 可參考以下資料：

特區護照續期｜申請所需時間 

3. 調亂證件

好多時因為方便，會keep左家人證件， 但如過關時一下唔小心調亂左，就大件事。

曾經試過有一名33歲香港男子聲稱不慎與63歲父親調亂身份證，無意間手持老父身份證，於落馬洲口岸過關往深圳，竟成功通過關員核查。

過關後及時發現出錯，事主折返向入境處人員報告，惟入境處人員要求他到父親所居住的元朗護老院，索取父親簽署的授權書及本身的身份證，再到口岸辦理出境手續，最終事主花數小時始成功過境。

試想像如果是搭飛機的話，飛機早就唔等人啦！

4. 掛住Shopping

身邊成日都有朋友試過遲到上唔到機，因為佢哋掛住shopping,遇好少時間坐車去機場， 甚至喺機場免稅店都買到樂而忘返，唔記得咗飛機起飛前要提前20分鐘到個Gate。所以各位購物狂要控制一下自己啦！