【澳門情報】 舊愛阿晶離世未夠半年 微辣前成員加蔥同女友儀仔註冊結婚

網路頻道微辣前經理人Jane（阿晶，劉靜儀）7月底於澳門輕生逝世 !

由於佢生前聲稱曾受欺凌甚至恐嚇，引發網民對微辣進行聲討。微辣其後宣布暫停更新頻道，而旗下多名成員都宣布離開，當中包括阿晶舊愛加蔥（林茂發）。

阿晶逝世未夠半年，今日有網民post出加蔥同同屬微辣成員嘅女友儀仔結婚照。流傳嘅照片所見，著上禮服及婚紗嘅加蔥同儀仔相信係喺澳門民事登記局進行結婚註冊儀式，背後大電視打出加蔥及儀仔真名（林茂發 張詠儀）。

喺2021年離開微辣嘅阿晶，同呢個平台有過不少瓜葛 － 阿晶曾與成員之一加蔥拍拖，分手後更爆出加蔥曾迫阿晶墮胎嘅新聞；而曾經自稱「不婚主義者」嘅加蔥，同儀仔拍拖不久後就向女友求婚，被網民狠批出爾反爾。而阿晶舊愛加蔥未婚妻、微辣成員儀仔亦發文澄清冇搶人男友，又話同阿晶只係同事。

阿晶離世前對微辣有不少控訴。離職時，阿晶曾經開直播指微辣老細六豪子「喊住留自己」，微辣多位成員後來紛紛用濾鏡post喊樣相，被網民認為係明寸阿晶。而阿晶在離世前的多個帖文中，對各種指控及不滿有所解釋，包括否認搶走微辣舊同事嘅工作，佢又表示一眾成員嘅「po喊相事件」令佢受攻擊，認為向有份po喊相各人道歉當日係「人生最委屈一天」。

阿晶又控訴曾被人用電話通知「有兄弟想搞死你」以叫佢收聲。不少網民認為阿晶出事同微辣有極大關係，紛紛留言鬧爆。微辣多名成員出po悼念阿晶，亦有人發文與事件「割席」。曾經po過喊相嘅2位微辣女成員佩男同思男，喺阿晶逝世後分別否認有霸凌行徑。

微辣喺阿晶離世後於社交平台發聲明，表示「得知前員工不幸離世，本公司對此深感哀慟及遺憾，並向其家屬致以深切慰問」。後來風波越鬧越大，創辦人六毫子向員工發信指「今次悲劇的教訓實在太大」。而微辣近月已停止運作，其澳門辦公室更已退租遷出。