【教學情報】 學齊以下呢5點 一個人旅行仲有咩好驚？

近年越嚟越多人鍾意獨自去旅行，自己一個去旅行又唔使遷就其他人，想去邊玩就邊玩！

一個人去旅行可以靜下，又可以沉殿下自己，唔使chur住要趕去玩，得閒嘅時候又可以認識下新朋友，增添下行程趣味，真係好值得賞試一下。以下呢幾個小貼士就係幫各位獨遊新鮮人好好計劃下你嘅行程。

5個「一個人旅行」必學點01: 慎選目的地

第一次獨遊，目的地梗係要小心揀，一般來講最好選擇一個語言能溝通到的地方，確保你喺行程之中遇見嘅困難會比較少。另外如果第一次嘅話最好去一啲交通比較發達，而且旅遊政策亦都比較完善嘅地方，而近年好多東南亞國家嘅旅遊業都漸趨成熟，絕對可以列入考慮嘅範圍。

5個「一個人旅行」必學點02: 慎選旅遊季節

唔同嘅國家係唔同季節去都會有唔同嘅氣候，有啲甚至會影響到你可以觀賞嘅風景或者進行嘅活動，好似如果去東南亞國家就要避開雨季，如果係去熱門大城市最好就避開旅遊旺季，相對來講住宿同機票嘅價錢都冇咁高。

5個「一個人旅行」必學點03: 買機票無猶疑

好多人都想獨遊，可惜遲遲都未能實行，其實只要你確定有假期，而且決定好出發嘅時間同地方，就好拿拿聲買機票，因為一旦猶疑，越拖就越耐，最終就無辦法起行。

5個「一個人旅行」必學點04: 預先下載實用apps

一個人係當地好多時都孤立無援，所以岀發前最好就下載定一啲當地實用apps，好似係當地地圖、餐廳推介、交通指南等，就算無計劃行程，都可以隨心而行。

5個「一個人旅行」必學點05: 旅行保險

獨遊去旅行，唔多唔少都有啲風險，所以最好就係岀發前買定旅遊保險，如果一個唔好彩，無論係行程delay，定中途唔見行李，都可以有所保障。