女生們小時候都有過嘅我的志願，
醫生
社會上總有些聲音認為做醫生好好，令女生們都會有諗過做醫生，但係慢慢大個知道，原來做醫生的門檻都相當高，成績咁上下都唔使旨意，而且唔好以為做醫生就一定好好，係公營機構嘅醫生都做到有氣冇埞唞。
老師
老師可能係細個接觸最多嘅職業，所以大家都有幻想過做老師。但係現實中，老師除咗可以多hot season嘅假期之外，其實大體都冇乜好處，尤其可以睇到教小朋友係幾咁勞氣，仲要唔係一個，係一班。
空姐
空姐俾人感覺好優雅，同埋又可以周圍飛。但係往往大家都冇諗過各樣關於時差嘅問題，而且一個人喺外地要一個人一間房， 膽少怕鬼嘅一定唔適合。空姐人工亦都唔係特別吸引，而家更加慘添。再者性質上，其實都同餐廳侍應係冇乜分別，只不過你係空中（有機會通宵）送餐。
家庭主婦
女生們都夢寐以求，想自己組織一個幸福嘅家，有自己嘅小朋友，開心愉快地過生活⋯⋯不過，現實嘅生活再一次係狠狠地打我哋一拳。當自己做咗媽媽嘅時候，就知道呢份工唔容易做，完全冇得攞大假，冇得請事假、病假，而且冇準時返工放工，你側邊嗰位同事呀老公仲分分鐘係豬隊友，仲有呢份工由小朋友一出世開始，做到你差唔多死為止， 冇得劈炮唔撈。不過呢份可以話係世界上最偉大嘅工作。
所以有時都係夢想還夢想；志願還志願，現實係另一回事。 只可以話我哋細個講出我的夢想嘅時候，班大人都想我哋保持憧憬，冇話俾我哋聽殘酷嘅現實，夢想背後原來有好多唔理想嘅野。
最愛探討女生世界!!
【GOGOAdvise Girl女生王國 現在徵稿】
歡迎來稿分享對戀愛、女生用品、女性話題既情報。如蒙投稿，請寄 girl@gogoadvise.com.hk，另請附上照片一張及不多於80字撰稿人簡介，撰稿人可用真名或筆名。文章一經採用，或會將由Girl女生王國編輯部作潤飾，及會開設作者個人專欄。
