早前漁護署宣布，該署轄下郊野公園的41個露營地點恢復正常服務，同時推出「大欖郊野公園荃錦營地」嘅預訂系統先導計劃，大家以後去荃錦營地，可以透過系統預訂營位露營啦！
荃錦營地位置方便，於荃錦公路旁嘅巴士站下車，步行5分鐘即可到達入口。營地合共提供37個營位，其中4個為雙營位。單營位可以容納1至4人，而雙營位則可容納5至8人。
每個營位均附設1個平台同1套燒烤爐及可供煮食爐具使用嘅枱櫈。營地同時設有洗手間、水源同垃圾收集設施。
加埋附近有位泊車同洗手間， 絕對係露營新手嘅好選擇！
預約系統全年24 小時運作，可以預訂29日內嘅營位。 系統會列出可供預約嘅營地位置，點選「預約」後填妥個人資料，即可提交表格。
完成預約後，會收到電郵確認。每次可預約1晚或2晚。 （到步之後如有空位可以再加，每人最多可以住4晚）
荃錦營地設有營地服務處，入營前需完成入營手續，取得「露營卡」後先可使用營地。
每日入營時間為下午2時至6時，離營時間為離營日上午11時前。
喺預約之前，等小編比啲小TIPS大家啦！
1. 26 號營位自成一角， 私隱度高， 如果唔想比其他人騷擾，呢個絕對係好選擇！
2. 服務處提供露營用品租借服務。 只要繳付按金和簽署租借服務協議，就可以租借露營用品套裝， 對於新手來講絕對係一個喜訊， 又或者唔想孭咁多裝備嘅話，都係一個唔錯嘅選擇。
3. 雖然而家有好多收費營地，但唔係個個都俾你帶埋寵物一齊去，荃錦營地就可以啦。 難得親親大自然，梗係要帶埋佢啦!
4. 實名登記：申請人必須在露營期間身處營地。 所以唔好幫人哋預約啦!
5. 記得唔去嘅話要取消返。如未能於預約入營日當天下午 6 時 或之前取消預約，申請人可被暫停預約營地資格 9 0 天。
6. 惡劣天氣。如天文台發出紅色/黑色暴雨警告信號、或三號 以上嘅風球，營地會關閉， 所有露營人士必須盡快離開營地。
7. 荃錦營地逢星期三封閉(公眾假期除外)，以進行場地保養和清潔。
8. 所有露營人士最遲須於星期三上午11時離營。要早啲起身煮早餐， 先趕得切喺11點前執好晒啲嘢離開。
荃錦營地服務處
電話：2 4 0 2 1 8 7 4
電郵：c a m p i n g @ a f c d . g o v . h k
辦公時間： 星期一至日，包括公眾假期 上午 1 0 時至下午 1 2 時 3 0 分 下午 1 時 3 0 分至下午 6 時 (下午 1 2 時 3 0 分至下午 1 時 3 0 分暫停服務)
其實呢個新嘅先導計劃，應該可以杜絕長期營霸， book咗就一定有位，唔使去到無位要掃興返歸。 但若然係想即興露營，就應該冇乜機會啦，因為系統所見，現時荃錦營地可供預約嘅周末均已爆滿，只餘下極少量位置！
而長遠而言， 都有令人擔心會唔會好似康樂場地炒有賣現象，漁護署的回覆亦提及計劃採用實名制，有望可打擊炒賣行為，而服務承辦商也表示會安排職員在晚間巡查申請者是否在場，確保營位被合理使用。
無論如何，營地關閉咗咁耐， 再次重開能有一番新景象， 有完善嘅管理，冇咗以前營貼營嘅情況，都算係一件好事。喺度預祝大家預約成功！
鈴…鈐…鈐…
【GOGOAdvise Travel旅遊日記 現在徵稿】
歡迎來稿分享對旅遊、購物、美食、活動既情報。如蒙投稿，請寄 aeronautmediacompany@gmail.com，另請附上照片一張及不多於80字撰稿人簡介，撰稿人可用真名或筆名。文章一經採用，或會將由Travel旅遊日記編輯部作潤飾，及會開設作者個人專欄。
